СЬЫЛАНКЫВО, кыдзи нӧ та йылысь Висьталан кывйӧн: Став мореыс веськаліс Тӧлысьлӧн сывйӧ, Пыр тіралӧ, дзирдалӧ, Синъястӧ ёрӧ, Роч сьыланкыв миянлы Сьылӧ синьора! А лунвывса вой Сэтшӧм долыд да кыпыд, Кӧть комиӧн тшӧтш «Югыд кодзувтӧ» кыпӧд, Но сьыланкыв тэныд ми Ӧтвылысь сиам, Пӧсь шонді моз дзирдалысь, Муса Россия! Корабль мунӧ Каприлань Неыджыд ӧдӧн, Кӧть ва туйсӧ важӧн нин Зэв бура тӧдӧ, А сьыланкыв юргӧ Пыр ёнджыка, гора; Синьора синьорӧс тшӧтш Ас дінас корӧ, Неапольса докеръяс Сувтӧны кытшӧ... О, сьыланкыв, кодӧс тэ, Кодӧс он ышӧд! Ме аддзылі лунвывса Войыслысь мичсӧ, Кор мӧвпъясыс быдӧнлӧн Ӧтлаӧ йитчӧ, И некор ог вунӧдлы Сывъясьӧм кияс... Тэ со кутшӧм вӧлӧмыд, Миян Россия!
