ПЕР-ЛАШЕЗ

Коммунаръяслӧн стен бердын нэр катшасинъяс,
Быттьӧ дзоргӧны ме вылӧ кельдыштӧм синъяс.
Дзеба лов шыӧс. Копырта на весьтын юрӧс.
Коммунаръяслӧн стен...
			Пуля гижтӧма вурыс...
Тані узьӧ Гаврош, узьӧ садьмывтӧм унмӧн,
Узьӧ ичӧт Гаврош, узьӧ первой Коммуна,
Коді ӧзйыліс му весьтын яръюгыд биӧн,
Кодӧс лыйлісны тьеръяслӧн гырдӧдӧм кияс.
Коммунаръяслӧн стеныскӧд дзик орччӧн вӧйи
Маутхаузен лагерысь чукӧртӧм пӧим.
Татшӧм пӧимсӧ некод эз аддзывлы нэмас —
Кыксё тысяча мортлӧн сэн вирыс и вемыс.
Гашкӧ, шог вӧсна дзоридзьяс лоины вижӧсь?
Гашкӧ, сьыланкыв талун эз юргы Парижын?
Некод сотны Коммунасӧ эз вермы биӧн, —
Мулысь джынсӧ нин сывъяліс-югдӧдіс сійӧ.
Видзӧд, Эйфельысь вылӧджык кыпӧдчӧм
						вуджӧр
Коммунаръяслӧн стен бердсянь водзӧ пыр
							вуджӧ!