* * *

Коркӧ верма мӧй вунӧдны
	дзик тӧдтӧм нылӧс,
Коді гусьӧник бӧрдіс
	Стокгольм бердса портын?
Сійӧ сёрӧн нин, тыдалӧ,
	тӧдмаліс-кыліс,
Мый «Победа» корабль
	бара веськӧдчис гортлань.
Вӧлі рыт. Сійӧ локтіс
	эз ӧтнас, а кыкӧн:
Ылі йӧз муысь нылыслы
	сюрӧма верӧс.
Важ пакгаузлӧн вевтланьыс
	зэв ыджыд зыкӧн
Пессис енэжысь уськӧдӧм
	кунва кодь зэрыс.
Кодкӧ шыбитіс шайт
	нывлӧн нюжӧдӧм киӧ,
Кӧть эз вӧв сійӧ миянысь
	омӧль ни, гӧль ни.
Туйӧ миянӧс колльӧдіс
	тысяча биӧн
Эзысь морелань ляскысьӧм
	мича Стокгольмыс.
Ме эг юась, кыдз сьӧд синма
	веськаліс татчӧ,
Мыйла эновтіс
	батьыслысь, мамыслысь мусӧ.
Кувны лӧсьӧдчӧм мортлысь моз
	шог сӧмын аддзи,
Кодӧс некутшӧм шуд
	сылӧн синмысь эз кусӧд.
Еджыд каляяс горзісны —
	дзайгисны гора,
Алӧй вымпелъяс качисны
	мачтаяс йылӧ.
Кодыр мортыдлӧн сьӧлӧмыс
	кык пельӧ орӧ, —
Сьӧкыд та йылысь висьтавны
	мортлӧн жӧ кылӧн.
Восьса эрдъяслань бара ми
	тӧвзьыны мӧдім,
Море нуис Стокгольм бердысь
	миянӧс ылӧ.
Уна шог, коді сулывлӧ,
	дыр кадӧн пӧдӧ, —
Чужан му вӧсна шог
	нывлысь нинӧм оз ылӧд.