ПОЖӦМПашкыр юра пожӧм Эжва бердын шувгӧ, Быттьӧ тӧв и гожӧм Код вылын кӧ увгӧ. Сійӧ абу том нин, Сирӧн чорзис лолыс: Некод оз нин помнит, Кымын морт нэм олӧ. Пыжӧн кывтан-катан, Ылі ягӧ мунан, — Пожӧм улын, татӧн, Шойччыштны он вунӧд. Орччӧн Эжва пессьӧ, Либӧ шлывгӧ чӧла. Мудзӧм мышкад пестер Некор кӧть он кӧлав, Кывзан, кыдзи вашкӧ, Пожӧм сёрни панӧ, Казьтылӧ на, гашкӧ, Перымса Степанӧс. Вит сё во нин бӧрӧ Сійӧ кадсянь коли, Кодыр пемыд вӧрын Рочӧс аддзис коми, Ӧні ставным сылы Медбур аттьӧ сиам, Йӧзлы радлун вылӧ Ов, миян Россия, Уна чой-вок дінын Медся шань да муса! Дона чужанінӧн Тэ он прӧста шусьы! ...Пожӧм важ моз нуӧ Эжва вожын вахта: Кылӧ — поезд мунӧ, Аддзӧ — кыптӧ шахта. Югыд спутник Мулӧн — Выль сӧветскӧй кодзув — Чолӧм миян юлы Ыстӧ лэбигмозыс. Регыд парма-эрдыс Шызяс ыджыд горӧн: Гызяс пожӧм бердын Миян Коми море; Эжва сетас кисӧ Муса Волга-чойлы. Югдас лыдтӧм биӧн Миян ыджыд Войвыв! Кывсян, майбыр, ылӧдз, Миян Коми муӧй... Та йылысь, дерт, сьылан, Менам пожӧм пуӧй!
