МИ ВОИМ ЧУМӦ

Ми воим чумӧ вой шӧр войын
Да узьны уськӧдчалім пыр,
А зэрсӧ енэж помся койис
Дзонь море ва кытчӧдз эз быр.

Кор вылад некӧн абу косыс,
Он думайт корсьны кынӧмпӧт.
Сэк бара тэрмасьӧмӧн косас
Мудз юрӧ ичӧтдырся вӧт.

Ог чумын куйлы...
Ог. Ме ылын,
Кӧн коркӧ ӧзйис челядь сям,
И мелі кияснас, ме кыла,
Кыдз тӧбӧ-шонтӧ муса мам.

Бур шудыс туй выв мортлӧн эм кӧ,
И йирмӧг войыс абу кузь.
Но мыйла ӧтнас пӧрысь ненка
Ас чумас та дыра оз узь?

Ме, вӧлӧм, сылысь кисӧ кылі,
Кӧр волльӧн менӧ тӧбис кор,
И кӧдзыд зэрысь бара ылӧ
Сэк нуис унлӧн тэрыб борд.

Ме йӧзлӧн радейтӧмнас шуда,
Пӧсь муслун сьӧлӧмысь оз ям.
О, кыдзи, кыдзи тэнӧ кужа
Благӧслӧвитны тӧдтӧм мам!