КОММУНИЗМЛӦН КОДЗУВ

Тайӧ абу вӧт,
А збыльысь ыджыд чудӧ,
Вӧчны вермис
Сӧмын миян морт:
Тӧлысьлань ракета лэдзис...
Шуда
Сылӧн югыд, вына,
Паськыд борд!

Кытысь аддзан,
Корсян сэтшӧм кывъяс,
Ошкыны сӧветскӧй
Йӧзлысь нэм?
Выль планета
Шонділӧн пӧсь сывйын,
Миян герба
Выль планета эм!

Тыдавтӧм орбита
Ассьыс вуджӧ,
Некор сэсся
Сійӧ оз нин ор.
Шуласны,
Выль кодзув кодыр чужӧ,
Шудаджык на лоӧ
Миян морт.

Ӧти бӧрся
Мӧд ракета петас
Югдӧдны
Вселеннӧйыслысь эрд.
Дзирдав уна тысяча
Планетаын
Коммунизмӧ мунысь
Мулӧн герб!