* * *

Быд мортлӧн эм слаблун, и менам эм сійӧ:
Нэр дзоридзыс ачыс пыр вӧзйысьӧ киӧ.
А тайӧс... Сурӧвӧя лелькуйтіс море
Да пленӧ моз ас дінас ӧтнассӧ дорис.

«Мый дзоридзысь морелы? — думайті дыр ме. —
Кын войвылын ӧвтчыны-шогсьыны тырмас!»
Ме нетшышті сійӧс да книгаӧ сюйи,
Лӧнь лунвылӧ Карасянь зэв ылӧ нуи.

Кӧть некод эз аддзыв, эз тӧд менсьым мыжӧс,
Но сьӧлӧмӧдз морелӧн ёрӧмыс йиджис...
Ме гусялі морелысь дзик ӧти дзоридз,
А сы пыдди ачымӧс сы дінӧ дори!