ПРЕМИЯАслам шуд вылӧ ог норась, Бурджык кӧсйӧмӧн ог вись: Трактор дінӧ муслун дорысь Нинӧм сьӧлӧмӧ оз письт... Весиг ачыс выль начальник Ӧні юкӧ менсьым дум: Пӧдаритіс премиальнӧй Шевиотӧвӧй костюм. Трактористыд, зонмӧй, сэтшӧм, — Аслас удж вылӧ пыр горш, И кор премияыс петӧ — Кыдз нӧ сійӧс тшӧтш оз босьт? Но эз вывті ыджыд радлун Сьӧлӧм пытшкӧ меным йидж, И эз сійӧн, мый эз ладмы Сьӧд костюмӧ югыд кизь. Кӧсйи шуны крепыд кывъяс: — Босьт, начальник, тайӧс бӧр... Меным аслам ставыс тырмӧ, Меным быдтор сетӧ вӧр. Шевиотӧн кытчӧ муна? Важӧн тӧдса сылӧн мич, Гӧтыр сідз менӧ оз вунӧд, Ёртӧй менӧ тӧдӧ сідз. Озырлуныс менам сьӧрысь: Помтӧм-дортӧм чужан му... Выль костюмӧн менӧ вӧрысь Некод видзӧдны оз кут; А ӧд ягын, тӧдан ачыд, Запевалӧ — тракторист... Тӧдны ме йылысь пыр ачыс Кӧсйӧ медыджыд министр. Босьтам трубка — Сыктывкарӧ: «Видза олан, Митипор!.. Мыйта вӧр тэ кыскин бара, Вося плантӧ тыртан кор?» Мый ме висьтала? Эг лыддьы... Тэ, начальник, сідзжӧ эн, А Доска почёта пыдди Клубын сӧмын тыртӧм стен. Со мый вӧсна ыджыд радлун Выль костюмыс мен оз сет... Мыйла пыр, начальник, падман Смена бӧрын гижны тэ, Кыдзи тракторъяслӧн шумкӧд Йитсис уджлӧн кыпыд гор, Кутшӧм мича да выль думӧн Локтӧ вӧрысь Митипор? Гиж Доска почёта вылӧ Ставсӧ сідзи, кыдзи эм, Опишит тэ, ӧти кылӧн, Сьӧлӧмын мый менам эм... Татшӧм премиясӧ некор Шевиот вылӧ ог веж. Коркӧ волас кӧ директор, Медводз шуас: «Молодеч»! Тӧвзяс му пасьта сэк слава Коми зон йылысь оз весь: Кӧнкӧ перъясны выль лава, Кӧнкӧ кыпӧдасны цех. Митипор жӧ оз ло пайтӧм — Тӧдчӧ сылӧн зумыд ки! Гашкӧ, ме йылысь ЦК-ӧ Доложитас сэк министр: «Сідз да тадз... А коми вӧрын Ӧні юргӧ Митипор...» А ЦК-ын — сёрни шӧрын: «Настоящӧй сійӧ морт!» Со, начальник, кутшӧм делӧ... Пыр на тэ он гӧгӧрво, Мыйла удал мортлысь смела Колӧ гижны ним да ов Стенгазетаӧ, доскаӧ — Бурджык премия он корсь! А костюмсӧ... Мед нин... тайӧс... Но, а мӧдӧс... Ог, ог босьт! Гӧтыр тӧдӧ менӧ сідзи, Да и ачыд гӧгӧрво: Медбур козин вӧр лэдзысьлы — Став народсянь пӧсь любовь!
