ПОЖӦМ

Уна тулыс да гожӧм
Мича, веж юра пожӧм
	ассьыс висьтавліс шог;
Шувгис тӧвйылын нора,
Небесаыслысь корис
	мыйкӧ пыр аслысног.

Весиг тӧдтӧм охотник,
Кодлӧн воськолыс кокни,
	тан эз колльӧдлы вой;
Сійӧн, шуӧны, сирыс —
Зарни пожӧмлӧн вирыс —
	киссис войт бӧрся войт.

Ачым аддзылі талун,
Кыдзи посйисны шпалӧн
	ылі войвылӧ туй,
Паровозъяслӧн шумын,
Миян уджын да думын
	сьыліс ягвывса пу.

Водіс-копыртчис сійӧ,
Пашкыр лапъяса киӧн
	кутіс ловзьӧдӧм му,
Кӧні ни ӧти ордым
Югыд лун коми мортлы
	водзті сьӧрсьыс эз ну.

Уна тулыс да гожӧм
Дзормис-вӧтасис пожӧм,
	йӧзлы висьтавліс шог...
Кывзысь пармалӧн шыӧ:
Сыкӧд ӧтвылысь сьылӧ
	миян шуда народ!