КАРСКӦЙ МОРЕЫН ГЫМАЛӦ ШТОРМ

Карскӧй мореын бара нин гымалӧ шторм,
Пессьӧ береглань мудзлытӧм гы.
Тані ловъяыс сӧмын и эм Каравом ^чери кыйысьяслӧн посёлок Карскӧй море берегын/^
Да руд калялӧн никсалан шы.

Тыртӧм берегын ылісянь тыдалӧ крест,
Кодӧс кыпӧдіс ас вылас из.
Эг ӧд прӧстӧ ме лэб татчӧ тысяча верст,
Медым сы йылысь ӧні эг гиж.

Тайӧ висьтыскӧд йитсяс и радлун и шог,
Сійӧс помнитны кутам ми дыр, —
Шуштӧм эрд вылӧ первойысь воськовтіс кор
Русскӧй нима, смел сьӧлӧма ныв.

Но Русановлӧн таланьӧ кыссис нин след,
Куйліс полюслань Чкаловлӧн туй.
Медым ылыс, сурӧвӧй да грознӧй пыр мед,
Но ӧд вӧлі тан дойӧдз рӧдимӧй нин му.

Нуис службасӧ вернӧя дзоридз кодь ныв,
Сідзи, тшӧктӧ кыдз сӧвесть да долг,
Тэрыб радио-ключлысь вӧсньыдик шы
Весиг некор эз пӧдтывлы шторм.

Помтӧм йияс пыр Норильскӧ муніс корабль,
Каравом весьтӧд тӧвзис пилот,
Миян Рӧдина ачыс, кыдз тӧждысьысь мам,
Налы восьтіс лӧз морелысь от.

Ӧти асылӧ, кынтіс кор бушколыс вир,
Ланьтіс виччысьтӧг зэв ылыс пост.
Тэрыб радио-ключ вылын кӧдзалӧм ки
Весиг гижны эз вевъяв нин SOS...

Тыртӧм берегын кодйисны зэв джуджыд гу,
Важмоз лэптісны сы вылӧ крест,
Русскӧй нывлысь душасӧ кын морӧса му
Уна нэмъяс чӧж видзис тан мед.

Карскӧй мореын бара нин гымалӧ шторм.
Пессьӧ береглань мудзлытӧм гы,
Быттьӧ сьылӧ сурӧвӧй природалӧн хор
Ӧти ныв йылысь пыр сьыланкыв