ПИТайӧ сёрнисӧ ӧд сійӧн Заводита ме: Ещӧ ӧти дона пиӧс Сетіс шудлун мен! Ӧткодь меным: ныв кӧть, пи кӧть, — Бурджык, дерт жӧ, пи... Сӧмын мый ме сылы сета, Кутшӧм аддза ним? Ставсӧ помнитны он вермы, — Быд ним шань да бур. Лоас, гашкӧ, землемерӧн, Агрономӧн, инженерӧн, — Сӧмын ним оз сюр! Шудлун вӧзйӧ менам пилы Завидуйтысь ёрт: — Медся мичаыс — Василий... — Со тай, ошкантор! Дзик оз кажитчы... А сійӧ: — Сӧмын медбур пи Вермас миян смел комдивлысь Заслужитны ним!.. Сиктын тӧдмалісны важӧн Менсьым шуд да шог, Быдӧн вӧзйӧ ассьыс радлун, Коді кӧть оз лок. Председательлы колхозысь Сідзжӧ делӧ эм: — Кӧсъя лоны, — шуӧ, — водзвыв Вежайӧн нин ме, Сетан кӧ тэ аслад зонлы Интереснӧй ним, Кодӧс радейтӧ зэв ёна Миян выль министр. А избач оз сӧглашайтчы: Пред пӧ — подхалим, Весиг челядьлы пыр чайтӧ Сетны важнӧй чин; Колӧ лётчикӧн пӧ лоны — Быдтыны ён борд. Кӧсъя, медым лоӧ зонмысь Чкалов кодь пилот! Дзикӧдз падмӧдісны менӧ, Кольмис весиг юр... Коператор мыччӧ меным Яндӧватыр сур: — Поздравляйта, шуӧ, пиӧн, Сиа выль успех... Чайта, лоа ӧні сылы Медбур тьӧзка ме!.. Председательлӧн, избачлӧн — Ставлӧн мӧвпыс бур... Неужели нимсӧ ачым Корсьны ме ог куж? Сета пилы кутшӧм воас Сьӧлӧм вылӧ ним... Шуда му вылын век лоас Шуда гражданин!
