РУССКӦЙ НАРОДЛЫ

Дзор нэмъяс пытшкын колис лыдтӧм во...
Оз помнитны сё вося пӧрысь пуяс.
Сьӧд пармаӧ кор пырис коми морт
Зэв важӧн коркӧ зверлӧн ветлан туйӧд.

Судьбакӧд тышын сійӧ корсис шуд,
Но тайӧ шудыс котӧртіс пыр водзӧ,
И чайтіс морт, мый некор оз нин чуж,
Оз мыччысьлы небеснӧй югыд кодзув.

Лёк вой тӧв шӧйтіс, кынтіс мортлысь лов,
Шог ветліс орччӧн, правда — кӧнкӧ ылын,
Сэк юкин вӧралысьлы ассьыд нянь да сов
Да ставсӧ сетін пиыдлы моз сылы.

Тиранъяс улын ачыд вӧлін гӧль,
Но пӧсь душанад кылін йӧзлысь шогсьӧм,
Быд керкаын тэ лоин медбур гӧсть,
Сердечнӧй гӧсть, желаннӧй медбур вок тэ.

Важ олӧм казьтылам ог сійӧн ми,
Мый русскӧйлы да коми мортлы муса, —
Бедалӧн часӧ, не кӧ тэнад ки,
То нациялӧн олӧм миян кусі!

Бур дружба кывйысь абу бурджык мич,
Ӧд сӧмын тайӧ кывйӧн сьӧлӧм бурмӧ.
Великӧй русскӧй морт — рӧднӧй Ильич —
Свобода корсьны лэптіс йӧзӧс штурмӧ.

Быд мортлы дона аслас чужан му,
Быд турун ситор сьӧлӧмнымлы муса,
И ӧти мам — Сӧветъяслӧн Союз —
Отчизнаӧн став кывъяс вылын шусьӧ.

Пӧсь аттьӧ тэныд ставсьыс, русскӧй вок,
Быд кыв вылын, быд сьыланкылын слава.
Мед олас миян вынйӧра держава —
Свободалӧн да дружбалӧн оплот!