СТАЛИНГРАДСКӦЙ БАЛЛАДА«Найӧ вӧліны дас квайтӧн, на лыдын и Михаил Шуктомов, коми зон...Гвардеецъяс примитісны неравнӧй бой 15 фашистскӧй танккӧд...Медся сьӧкыд здукӧ гранатаясӧн киясын найӧ уськӧдчисны танкъяс улӧ, но позициясӧ эз сдайтны...»(Сталинградскӧй эпопеяысь.)IКоркӧ волан кӧ Волгалань тэ, — Пӧся окышт тась ранитчӧм мусӧ, Кӧні Миша Шуктомовлӧн кусі Кодзув югӧр моз дзирдыштӧм нэм; Копырт юртӧ да пидзӧсвыв сувт Братскӧй гу бердӧ ӧти здук чӧла, Мед салдатыслысь палявтӧм ун Оз нин торк весиг котӧртысь тӧлыс... Сійӧ ми дінӧ мӧдысь оз лок Да оз аддзы чудеснӧй творенье, Кыдзи Волгакӧд сывъясис Дон Сэні, пуис кӧн коркӧ сраженье. Но быд дзоридз, быд веж турун си Кутас казьтывны нимсӧ салдатлысь, Коді олӧмсӧ сідзи эз видз, Кыдзи видзис быд из Сталинградлысь.II... Дас квайт гвардеецлы сиӧм висьт Сьӧлӧмын пессьӧ мед. Дас квайтӧн шуисны: — Враг оз письт, Лов кытчӧдз миян эм... Танкъяслӧн сталь улын ойзіс му, Тіраліс вӧр и ва. Клятва моз шуисны быдӧн: — Кув, Но Сталинград эн сдайт! Дас ӧти русскӧйяс: дас салдат Да лейтенант Чирков, Кык украинец да кык казах, Комиысь ӧти зон... Эм ӧмӧй му вылын сэтшӧм вын, Торйӧдас найӧс код? Сувтіс гвардеец: — Со... бара тшын... — Бара нин... — Шуис взвод. Ӧтилӧн — ранаяс, мӧдлӧн — вир Войт бӧрся киссьӧ войт: Дьявольскӧй крестъяса дас вит «тигр» Панісны смертнӧй бой. Ышловзис ӧти: — Салдатскӧй труд Весьшӧрӧ мед оз вош... Мӧд сэтчӧ содтыштіс: — Чужан му Некор эз вунӧд, зон... — Эм ылі войвылын Коми край, — Шуис Шуктомов. — Эм... — Мед эськӧ тӧдіс жӧ муса мам, Мый пыр на ловъя ме... Сэн менам томлунӧй... шудӧй сэн... Пожӧглӧн эзысь ва. Сюрс километр сайысь локті ме Пӧдтыны тась война. — Киев ме эновті... — содтіс мӧд. — Доймытӧдз ӧні жаль Думайтны: воӧм фашистскӧй сброд Талялӧ чужан кар... — Алма-Ата весьтын ӧні лӧнь... — Ӧзйис казахлӧн син: — Дас квайтӧн сулалам ӧні кӧн, — Миян сэн чужанін... Чӧв оліс дыр лейтенант Чирков, Сьӧлӧмас пыкис шог: Тыдалӧ, медбӧръяысь окоп Аддзӧны дас квайт вок... Ӧтилӧн — ранаяс, мӧдлӧн — вир Войт бӧрся киссьӧ войт... Вермис кӧ, быдӧнлысь командир Чукӧртіс сьӧлӧм дой, — Абу прӧщайтчыны ӧні кад, Кутлыны дас вит ки... ...Кыптіс дзик орччӧн фашистскӧй танк, Восьтіс окоплань би... Эм автоматъяс... Граната эм. Лӧгӧн быд сьӧлӧм яр... Сӧмын ёсь пуляӧн он ӧд вен Танкъяслысь кыз броня! Кыпӧдчис сэк Степаненко ёрт — Киевысь вернӧй друг: — Сизим граната эм сьӧрысь кор, — Ме вывті чӧрт оз вудж!.. ...Рӧдина! Лоӧ святӧйӧн час, Вечнӧ святӧйӧн му, Тэнсьыд кӧч вӧлятӧ, кыдз приказ, Дас квайтӧд пӧртіс друг. Юрӧбтіс взрыв... Потіс зумыд сталь, Чӧв ланьтіс сьӧлӧм шы... Дас витлань тӧвзис фашистскӧй танк. Кояліс би да тшын. Кыпӧдчис тэрыба мӧд салдат: — Миянӧс сідз он босьт!.. Сизим гранатакӧд тшӧтш запал Дас витӧд босьтіс вок. Уськӧдчис танк улӧ Кочетков — Русскӧй народлӧн пи. Воськовтны кувлытӧм мортлысь лов Весиг эз вевъяв би... Кыссис дзонь сутки неравнӧй тыш: Колисны куим друг... Лунвывса войыслӧн пемыд кытш Юкис салдатскӧй мудз. Шонді оз окав на чужан му, Тшын улысь эз на пет, — Танкъяслӧн ылісянь кыптӧм шум Садьмӧдіс помтӧм степь. — Дзебсьыны верман на... Бӧрын сён... — Шуис Чирков. — Но ми Дружбалысь помнитам бур закон, Ёртъяслысь дона вир... Мирын ӧд абу на мӧд металл, Восьтытӧм сэтшӧм би, Кодӧс оз выдержит смел салдат — Миян народлӧн пи... Некор оз висьтав ни му, ни ва Сійӧс, мый тӧдліс морт: Сувтісны паныдӧн куим танк — Куим немповтӧм ёрт... — Ӧчередь, тыдалӧ, другъяс, мен... — Тыдалӧ... — содтіс мӧд. Коймӧдыс окаліс найӧс: — Ме Быдлаӧ тікӧд тшӧтш... Сывъяліс русскӧйӧс коми зон, Сетіс казахлы ки: Эжвакӧд быттьӧкӧ йитчис Дон, Кыпӧдчис тан Памир. Кувнысӧ гижӧма ӧтчыд дзик, Помавны коркӧ нэм, Но быд геройлӧн ӧд чужан сикт Му вылын кӧнкӧ эм... — Эм!.. — шуис ёртъяслы русскӧй вок. — Ним сылӧн — чужан му... Шуӧны, абу пӧ сылӧн пом, Кодарлань кӧть эн мун... Сылы ми висьталім клятва-кыв — Видзны рӧднӧй рубеж. Нэмъяс чӧж ми йылысь сьыланкыв Юргӧ став мирын мед! Русскӧй, казах, удал коми зон Мунісны орччӧн пыр... Чышкыштіс танкъяссӧ биа борд — Куим зэв ыджыд взрыв. Бӧрдіс пӧсь му весьтын посни зэр... Руаліс Сталинград... Дас квайт том сьӧлӧмысь ён рубеж Вуджны эз вермы враг. Подвиг салдатъяслӧн некор оз кув, Славалы пом оз во. Шуӧны, пӧсь сталинградскӧй му, Сотчисны код вӧсна дас квайт друг. Окаліс ачыс вождь.IIIКоркӧ волан кӧ Волгалань тэ, — Братскӧй гу весьтас копыртчы чӧла... Сійӧн му вылын ӧні ми олам, — Найӧ сетісны ассьыныс нэм! Эм кӧ тэнад душа пытшкын ёг, Посни страстьясӧн сьӧлӧмыд ноксьӧ, — Пӧртны олӧмӧ подвиг да долг Медым выль вынӧн сы бӧрын воссьӧ. Дона быдӧнлы му вылын мир Да веж тулыс моз дзордзалысь томлун. Сэсся некор оз киссьы мед вир, Колӧ сы вӧсна тышкасьны, овны. Восьса ми водзын зэв ыджыд туй, Мудз оз кӧсйыны тӧдмавны кияс... Вечнӧ ов, Сталинград! Тэнсьыд му Сьывны кутасны пиянлӧн пиян.
