ОРДЫМСӦ ТАЙӦС

Ордымсӧ тайӧс
Тальлім ми коркӧ,
Ньыв пуяс костӧд
Лӧнь Эжва дорті.
Зарниа шор дорын,
Неылын сиктысь,
Муслунӧй сьӧлӧмлы
Тэнӧ тай ликтіс.
Мый вӧлі сьӧлӧмъяс
Миянлысь косьтӧ,
Некутшӧм кывъяс
Оз вермывны восьтны...
Янсаліг шуи ме:
Ордым ог вунӧд...
Мый сэсся пӧсьджыксӧ
Верми сэк шуны?
Надея воштӧг
Да куслытӧг олӧ:
Ордымсӧ лымъясӧн
Некор не толны, —
Воас, ме верита,
Бӧр сійӧ татчӧ,
Ваяс пилоткаын
Торйӧдтӧм счастье.
Шуас: — Ме аддзылі
Куимсё ордым,
Медмуса сійӧ,
Код мунӧ тэ ордӧ;
Прӧйдиті уна нин
Муяс да ваяс,
Мусаӧс некор
Эг аддзывлы таысь...
Ордымсӧ тайӧс
Тальлім ми коркӧ,
Ньыв пуяс костӧд
Лӧнь Эжва дорті.