НЕВИННОМЫССКӦЙ КАНАЛ ДОРЫН

Суховейясӧн чорзьӧм да потласьӧм степь
Ассьыс шудтӧм судьба ёрис уна сё нэм...
Тані сотчыліс ставыс, мый сӧмын на чужліс
Да Кубаньӧ кос вомдорнас йиджны эз судзлы.
Суховейяс жӧ пӧльтісны, пӧльтісны пыр,
Мортлӧн воля лёк бешенство сылысь эз пык, —
Мортлы страшнӧй беда сійӧ сьӧрсьыс пыр вайліс,
Мортлысь пӧимӧдз чишкавліс став урожайсӧ.
Ыджыд радлунӧн видзӧда сэтчаньӧ ме,
Кӧні дзоридзьяс эшкынӧн нюжаліс степь,
Кӧні паськыд каналыслӧн дзирдалӧ ваыс,
Кӧні водзӧ спокойнӧя видзӧдӧ Сталин
Из гӧра моз жӧ сувтӧмӧн крепыд гранитын,
Руд шинель костӧ топыда сюйӧма кисӧ.
Сэтчань видзӧдӧ вождь, кӧні шондіыс чужӧ,
Суховейяслӧн смерч кысянь степьясӧ вуджӧ,
Чингиз-ханлӧн ордаяс кыт волісны татчӧ,
Половецкӧй наездниклӧн след кытчӧ сатшліс.
Тайӧ — вождь лёк стихиялы шыбитіс вызов,
Сувтіс паныдӧн сылы,
			Кубань весьтын кывзӧ,
Косьмӧм мусӧ кыдз ловзьӧдӧ югыд канал,
Кыдзи ворсӧ том коръясӧн кыпӧдчысь сад,
Кыдзи гыалӧ вӧръяслӧн лӧзалысь море, —
Суховейяскӧд тыш вылӧ сувтӧм дозорын...
О, великӧй тэ вождь, гӧльӧсь кывъясӧй менам
Аслам морӧсысь чувствояс висьтавны тэныд...
Кытчӧдз му весьтын ломзьыны кутас пӧсь шонді,
Тэнад гений пыр дзирдавны куслытӧг пондас,
Став планеталы водзӧ пыр индыны туй...
Эн ӧд прӧста тэ степь весьтын кыпӧдчы-сувт:
И стихиялӧн вынъяс подвластнӧйӧсь тэныд,
Налы местаыс абу нин сталинскӧй нэмын...
Лӧз Кубань пӧлӧн нюжалӧм вӧръяслӧн визьяс
Тасянь веськыда индӧны туй коммунизмӧ.