ВЫЛЬ ПОЭМА

Медводдза юкӧн

Рӧмыд рытӧ кыа сылӧ,
Тувсов енэж кельыдлӧз...
Ӧньӧ петӧ мир туй вылӧ,
Крепыд морӧс бердын сылӧн
Выль гитара ӧшалӧ.
Выль-ӧ?
Збыль-ӧ?
Тронакывны
Вермас бура зэв и важ.
Вадор дорын ворсны, сьывны
Том йӧз кутас,
Эм кӧ гаж.
Гажыс тырмӧ, ворсысь лада,
Чуньяс улын шыыс збой.
Рытъя кадӧ
Вадор садйын
Дженьыд, дженьыд тувсов вой.
Муса Ӧньӧлы гитара,
Сьыланкыв оз костасьлы:
«Кор нин бара,
Кор нин бара
Армияӧ босьтасны».
Стоп! 
Со сылы муса керка,
Помтӧм тӧдса кильчӧдор.
Дивӧ вӧчӧ струна веркӧс,
Гора куим-нёль аккорд!
Серенада?
Гашкӧ, тешкодь?
Абу итыль муса ныв.
Кӧть и пӧрысь батьыс лешкӧ,
Машӧ кильчӧ иган вештӧ,
Мусӧ кок увсьыс оз кыв...