* * *

К. И.-лы


Муса ёртӧй, шамырт менсьым ки,
Гашкӧ, медбӧръяысь мӧда-мӧдӧс аддзам,
Гашкӧ, кусас миян сьӧлӧм пытшкысь би,
Олӧм визув бӧр оз вайӧд татчӧ.
Шамырт менсьым, муса ёртӧй, ки.

Туйным кежис. Тэнад аслад мог.
Менам олӧм некытчӧ оз туй ӧд.
Юмов мӧвпъяс юр вемӧ оз локны.
Ог тӧд, кодар бокын, кӧні менам туйӧй,
Кытчӧ кежа, коля ассьым шог. 

Олӧм туйыс лыдтӧм-тшӧттӧм вожа,
Ог тӧд, кытысь сюрӧ меным шуд;
Муна ылӧ. Сук йӧз пӧвстӧ воша.
Гашкӧ, чужан муӧс тӧдны ог нин кут.
Ог тӧд, кытысь аддза ассьым шуд.

Шамырт менсьым, муса ёртӧй, ки.
Гашкӧ, медбӧръяысь талун тэнӧ аддза.
Гашкӧ, оз нин йитчы миян
Сьӧлӧм пытшса би,
Олӧм визув бӧр оз вайӧд татчӧ.
Муса ёртӧй, шамырт менсьым ки.