* * *

Абу шань зэв тані менам оласног,
Абу ёртъяс. Гажтӧм и зэв пемыд
Менам оланінӧй. Сӧмын ог кут шог;
Жугыль босьтлӧ мукӧд дырйи сӧмын.
Кӧть и дженьыд, вывті кӧдзыд тӧвся лун,
Но пыр уна мӧвпъяс юрӧ вайӧ.
Муза ёрткӧд частӧ пальӧдлывлам ун
Рытын сёрӧдз кывбур тетрадь сайын.
Шань ёрт — Муза! Шаньджык оз и ков,
Сыкӧд некор эг на волӧй спорӧ,
Сы вӧсна мый олам, кыдзи индӧ лов,
Сьылам сідзи, сьӧлӧмным кыдз корӧ.
Некор Музаӧс ог юктав, ни ог верд,
Абу уджйӧза и сылы ачым.
Кӧть и тшыгӧм овлӧ, шуда вӧльнӧй эрд
Ми ас водзысь дугдывтӧг тай аддзам.
Ӧти сьылысьлысь ми ошкам сьылан гор,
Ӧти нылӧс радейтам тан пӧся.
Сьӧлӧм дінын миян ӧти муса ёрт,
Мый эм таысь кындзи нӧшта лӧсьыд?