* * *

Примета йӧзын сэтшӧм эм:
Бадь йыв оз пот кӧ Верба лунӧ —
Эн тэрмась петны гӧрны тэ:
Сёр гӧстьӧн локтас югыд тулыс.
Но тэныд нюжмасьны оз позь:
Тэ тӧрыт ачыд вӧрӧ ветлін
Да аддзин, кыдзи садьмӧм шор
Лӧз вомнас ӧктӧ верба шепъяс.
Быд асыв кылан: жӧлӧбдор
Кыдз пычкӧ сӧстӧм синва войтъяс,
Став вӧрса пӧткаяслӧн гор
Тшӧтш корӧ тэнӧ ягӧ койтны.
Примета, колӧкӧ, мед эм,
Но тэнӧ талун он нин пӧръяв,
Кор мулысь синмӧн судзтӧм эрд
Сё вӧлӧн кырӧ шонді-гӧрйыс.
Нянь вӧсна тыш — шуд вӧсна бой:
Дась петны талун нин тэ кӧдзны,
Оз прӧста тэнад зумыд содз,
Оз прӧста шамрав зарни кӧйдыс!