ПЕРВОЙЯ ЗЭР

Ӧти зэр войт уси...
Ӧддзис и ӧддзис!
Ӧшиньӧй синваӧн
Ньӧжйӧник бӧрддзис.
Тулысыс кымӧрӧн
Котӧртіс татчӧ,
Ыджыд, пӧсь корӧмысь
Висьтавны аттьӧ.
Мыйла жӧ, ӧшиньӧй,
Ӧтнад тэ бӧрдан,
Ставыс кор вежӧдӧ
Муяслӧн сёрдын?
...Челядьлӧн шоглуныс
Разалӧ кыдзи, —
Шондіыс югӧрӧн
Друг вочавидзис;
Синва кодь зэр войтын
Дзирдаліс сійӧ
Некытысь кывлытӧм,
Аддзывтӧм биӧн.
Мед тувсов кымӧрыс
Тӧвзис юр весьтті, —
Сьыланкыв сьӧлӧмын
Сійӧ мем пестіс!