ОХОТБАЗАЫН РАЦИЯ

«Вӧрлэдзысь» листбокын
Эм информация:
Ёль охотбазаын
Уджалӧ рация;
Выль позывнӧйясӧн
Йитіс эфирыс
Ылі охотниклысь
Ыджыд лӧнь мирсӧ...»
Ёль охотбазаын...
Мыйкӧ ог помнит, —
Кӧн тайӧ базаыс,
Кӧн, кутшӧм помын:
Мылваын, Илычын,
Айюва вылын?
Абу мӧй ӧткодь мем, —
Кыйсьысьӧс аддза,
Вӧр туйӧд яг вылысь
Тэрмасьӧ дядьӧ
Лун помын лэччӧдны
Шедӧдӧм прӧмыс...
Медым ме лоа
Лыддьысьысь сӧмын, —
Кыйсьысьлӧн шудлунӧн
Ставкӧд ме юкся,
Аддза, кыдз мудз пырысь
Локтӧ да пуксьӧ
Рация дорӧ дзор тошка
Охотник...
Лолавны меным тшӧтш
Долыд да кокни:
Уна сё верст медым
Куйлӧ ми костын,
Бушковъяс синъяс
Оз сетлыны восьтны, —
Аддза охотниклысь
Радуйтчан нюмсӧ,
Кыла эфирысь
Настройкалысь шумсӧ:
«Сёрнитӧ база,
Ёль охотбаза...»
Пармалӧн чӧвлуныс
Вошӧма важӧн,
Пӧрысь охотникыс
Олӧ выль гажӧн,
Тӧдса волна вылын
Кывзысьӧ сійӧ,
Юралӧ вӧрын кыдз
Спасскӧй часіыс.
Газетлӧн листбокын
Эм информация:
«Ёль охотбазаын
Уджалӧ рация...»
Тайӧ петитнӧй
Строкаясын юӧр
Миянлысь радлунсӧ
Му пасьта нуӧ.