ТЕХАСӦ, ВОЙНАСА ВЕТЕРАНЛЫ

Тэ менӧ помнитан,
	Техасысь варов Джим?
Тэ должен помнитны
	лӧнь Эльба дорын встреча,
Кор ӧта-мӧдлы
	нюжӧдім ми ки,
Враг весьтын сэки
	кресталӧмӧн мечьяс.
Ме гижа тэд письмӧ,
	ог тӧд кӧть, воас оз
Техасса карӧ,
	сьӧкыд нима карӧ,
Кӧн важмоз, гашкӧ,
	ӧні, варов зон,
Тэ ыджыд цехын
	пӧсьтӧ кисьтан бара.
Салдатскӧй кияс
	радейтӧны удж...
Тэ тайӧс сэки
	ачыд гӧгӧрвоин,
Кӧть Эльбаӧдз
	и джын германскӧй му
Пыр восьлалін
	походнӧй мича стройын.
Ми сэки паныдасим...
	Лӧня кывтіс ю,
А тувсов енэж
	вӧлі вывті лӧзӧн,
Кор кыпӧдім атакаын
	ми юр
Да шуим ӧти ловшыӧн:
	— Победа!..
И тэ сэк тӧдмалін,
	мый кӧсйин тӧдны дыр,
Тэ аддзин миянӧс,
	сӧветскӧй аддзин мортӧс,
Европаса
	народъяслы би пыр
Свобода коді вайис
	Волга дорсянь.
Тэ помнитан,
	кыдз сёрни пансис сэк,
Тэ кӧсйин тӧдны:
	— Кӧні Маршал Сталин?
И кылін победительлысь
	ӧтвет:
— Быд сьӧлӧмын,
	быд ловшыын салдатлӧн!
Ме висьталі,
	мый эм команднӧй пункт,
Вождь сэсянь ставнас
	ыджыд мирсӧ аддзӧ,
Боецкӧд сійӧ
	восьлаліс кузь туй
Сраженьеяс да
	битваяс пыр татчӧдз.
Винтовка помысь
	руаліс на тшын...
Тэ микӧд вӧлін,
	микӧд юкин радлун,
Тэ аддзин,
	кыдзи миян русскӧй штык
Свобода йӧзлы вайӧ,
	вайӧ югыд правда;
Тэ гӧгӧрвоин,
	мыйта помтӧм шуд
Сӧветскӧй мортлӧн
	пӧсь да вына сывйын;
Тэ тӧдмалін —
	планеталӧн выль лун
Пыр заводитчӧ
	югыд асыввывсянь.
Салдатскӧй каска
	босьтін юрысь сэк
Да вечнӧй дружбаын
	клянитчин сьӧлӧм биӧн,
Техасса зонъяс,
	шуин ачыд тэ,
Сӧветскӧй воинлы
	шуд кутасны пыр сины.
Свобода статуя
	кӧн лэптіс ассьыс ки,
Бӧр мунін тэ
	Колумбӧн восьтӧм туйӧд.
Ми сетім кыв,
	мый му вылын фашизм
Коричневӧй чумаӧн
	оз кут уйны.
Ми уна терпитім.
	Зэв уна кыским ми.
Ӧд кымын мам
	эз окышт пилысь чужӧм!..
И колӧ гӧгӧрвоны,
	колӧ тӧдны, Джим,
Салдатскӧй сьӧлӧмъяслысь
	кӧсйӧм ыджыд уджӧ!
Эз пӧльт Техасын
	тышлӧн бушков би,
А миян выльпӧв колӧ
	каръяс стрӧитны.
Ӧд быд кокни
	абу кокни ӧні, Джим,
Салдатлы сотчӧминӧ
	ассьыс синъяс чӧвтны.
Ми абу ӧтнаным.
	Выль мирӧ паськыд туй
Народъяс аддзисны
	да мунӧны нин орччӧн.
Но висьтав, Джим,
	оружье кузя друг,
Мый тіян Даллес
	му шар вылысь корсьӧ?
Ми сетам уважениелысь дань
Дзик быдӧнлы,
	код муніс орччӧн тышын,
Но кӧвъявны
	став мирыслы война
Ӧд талун кӧсйӧны нин
	тіян Уолл-стритын.
Эз тырмы налы
	йӧзлӧн киссьӧм вир,
И общӧй враг вылын
	оз радуйт нин победа,
Гудзон весьтын
	важ статуялӧн ки
Выль мирлы паныд
	чуксалӧ походӧ,
Оз русӧ ассьыс пӧльт
	лӧз океан:
Лёк клевета да лӧж
	сьӧд даллесъясын пузьӧ.
Ме пола тэ вӧсна,
	войнаса ветеран,
Оз шамырт медым
	голяӧдыд бизнес;
Ме пола тэ вӧсна,
	Техасысь варов зон...
Сраженьеяслӧн тшын
	кӧть эз на идрась,
Но бара нин
	походнӧй комбинзон
Тэд талун лӧсьӧдӧ
	йӧз вирӧн пӧльтчӧм гидра.
Лӧнь Эльба дорын
	тӧдмалін тэ сэк
Сӧветскӧй мортлысь
	пӧсь да вына сывсӧ.
Боецлысь талун
	юалӧ боец:
— Тэ веритан-ӧ
	аслад клятва кывйӧ?
Стремительнӧй
	атакаӧ моз сувт
Да лэпты сы весьтӧ тэ
	ассьыд сьӧкыд мӧлӧт,
Народъяслысь
	социалистическӧй
		Союз
Сразитны коді
	море сайсянь корӧ.
Ми — вына йӧз,
	ми тэчам шуда мир,
И будущӧйыс
	восьлалӧ
		тшӧтш микӧд.
Оз вермы сувтӧдны
	лёк черчилльяслӧн клика
Став му вылын
	грядущӧй коммунизм.
Ме должен гижны тэд,
	оружье кузя друг,
Салдатскӧй сӧвесть
	тайӧс талун корӧ:
Видз шуда мир,
	видз йӧзлысь югыд лун,
Видз клятва,
	кодӧс сетін
		Эльба дорын!
Спокойнӧй важмоз
	миян смел народ,
Код весьтын ломзьӧ
	Кремльлӧн алӧй кодзув.
Планета вылын
	медся мудрӧй морт
увереннӧя индӧ туйсӧ
		водзӧ.
Великӧй Кормчийлы
	подвластнӧй миян кад,
Историялӧн ход
	и став движенье,
И Сталин нимӧн
	мирысь быд салдат
Шуд вӧсна
	должен
		нуӧдны сраженье.