ВОЙНАЛЫ — ВОЙНА

Оз алӧй-гӧрд кыаӧн
	асылыс кой
Да лӧз океан весьтын
	ньӧжйӧник ойд:
Фашистъяслӧн-янкилӧн
	чумнӧй орда
Кореялысь вирӧсьтіс
	сӧдз небеса.
Дой пыкӧмӧн сыланьӧ
	видзӧдам ми,
Кӧн шоръясӧн визувтӧ
	йӧзлӧн пӧсь вир,
Кӧн куйлӧ руинаын
	мирнӧй Вонсан
Да кагалысь телӧсӧ
	окавлӧ мам...
Быд сьӧлӧмын муслун
	да ненависть эм, —
Свободалысь шонді
	он кусӧд, он вен:
Став муслунӧн дорйыны
	кутамӧй мир,
А скӧрлуныс сотас мед
	пеж Уолл-стрит,
Кӧн коймӧдысь пестыны
	му вылӧ ад
Разбойничӧй сброд талун
	бара нин рад.
Призывнӧй строкаясӧн
	юралӧ стих:
— Кореяысь прочь
	оккупантъяслысь ки!
Сувт миянкӧд орччӧн,
	Пекин да Бомбей,
Рабочӧй Монмартр,
	Бирмингам да Сидней!
Быд мӧлӧт мед кучкалӧ
	грознӧй набат:
Мир дорйыны дасьӧн ло,
	кыдзи салдат —
Кашмирысь индус,
	гаддьӧсь кияса негр,
Вьетнамец, зулус,
	абиссинец да негр.
Ог сетӧй ми жугӧдны
	челядьлысь шуд,
Свободнӧй кореецлысь
	рабствоӧ му,
Ог сетӧй разбойниклы
	пӧльтны война.
Мед грознӧя юргӧ:
	— Войналы — война!