ЕДИНСТВОЛӦН СЬЫЛАНКЫВ

Кор долыд чувствоясӧн
	морӧс тэнад пӧсь,
Не сьывны сэк он вермы —
	сьӧлӧм тайӧс корӧ...
И алӧй флагъяслӧн
	кӧн ӧвтчӧ алӧй море,
Тэ петан тшӧтш.
	Тэ петан сэтчӧ тшӧтш,
	кӧн кывтӧ йӧзлӧн гы,
Кӧн тувсов тӧвру вылын
	алӧй шӧвкыс пессьӧ.
И менам карын
	кыптӧм сьыланкыв
Призывӧн юргӧ
	Жёлтӧй море весьтын.
Ӧд тайӧ миян праздник —
	шуда Первомай
Планета вывті мунӧ
	алӧй стягӧн.
Пӧсь шонді кодлӧн
	радейтӧ душа,
Колоннаясӧ сувтас
	микӧд радӧ.
Капштадтысь сувтас
	орччӧн микӧд негр,
Британскӧй кнут
	код весьтын пыр на живгӧ.
Ми вынйӧра ӧтветӧн
	шуам: — Нет!
Война не ӧзтыны
	империалистлы!
Мед юргӧ уджлы
	вдохновеннӧй гимн
Да славитӧ став мирын
	мирлысь шудлун!
Став мувывса уран
	оз расщепит
Прӧстӧй народлысь
	тайӧ ыджыд дружба.
Зловещӧй руын
	пессьӧ пыр Бродвей: ^Нью-Йоркын банкиръяслӧн улица/^
Оз овсьы атомщиклы,
	дзескыд сылы мирыс...
Могучӧй гӧлӧс вочавидзас:
	— Нет!
Прӧстӧй народлӧн гӧлӧс
	паськыд мирысь.
Оз пыр Марсельӧ
	янкилӧн корабль,
Дзик нинӧм вӧчны сэні
	кортӧм гӧстьлы...
Мед проклятӧй оружиесӧ
	ва
Лӧз морелӧн
	утроба пытшкас босьтас.
Мед талун кывзӧ
	став планета му,
Роднӧй страналысь
	вынйӧра призывсӧ:
	— Мед олас мир,
	мед олас югыд лун!
И «Вив ля пэ!» ^французскӧй кыв вылын «Мед олас мир!»/^
	пыр шуасны французъяс.
Тшӧтш микӧд кыпӧдасны
	Сталинлысь портрет:
Великӧй Кормчийлӧн
	быд мортлы нимыс дона.
Мед нуӧ сьӧрсьыс
	праздничнӧй колонна
	став йӧзлы свет!