* * *

Керка вевт вылӧд сявмуні зэр,
Войтва чепӧссис жӧлӧбысь шор моз.
Тӧвру ылісянь юӧртіс мен,
Кыдзи потӧны бадь вылын коръяс.

Шуда челядьлы радлуныс мый!
Уличтыр найӧ петісны кӧмтӧг.
Еджыд морӧса, ёсь бордъя джыдж
Югыд войтъяссӧ тэрыба ӧктіс.

Ӧшинь дорысь мен вӧрзьыны дыш:
Татшӧм серпассӧ важӧн эг аддзыв,
Кыдзи сюясӧн вежӧдысь ыб
Зэрлысь чуньяссӧ азыма каттис.

Кымӧр вешйис, и шуровтіс друг,
Ваыс помасис сылӧн лӧз кӧшын.
Шудӧн йиджтысьӧм, кӧтасьӧм му
Аслас морӧсысь пычиктіс ловшы.

Радлӧ-сулалӧ туй бердын кыдз:
Шоныд зэр сійӧс пасьтӧмӧн суис.
Ӧшкамӧшкалӧн зарниа кытш
Эжва-юкмӧсысь ва бара юис.