ВОЙПУКАНІНЪЯСЫН ЮГДӦДЧАН УДЖ НУӦДӦМ

Пуксис тӧв. Лунъяс лоины дженьыдӧсь. Мӧдӧдчисны тӧвся кузь рытъяс. Уна прӧст кад лои том йӧзлӧн. Луннад найӧ уджалыштасны, а рытнад сэсся прӧстӧсь. Кыдзи нӧ найӧ кутасны колльыны тӧвся кузь рытъяссӧ? Дерт на, важ ногӧн кутасны войпукны.

Мӧвпыштан кӧ, мый эськӧ пӧльзаыс татшӧм войпукӧмсьыд. Том йӧз войпуканінъясын дурӧны, мыйсюрӧ сӧрӧны, матькӧны.

Войпукӧмъяс бырӧдны ӧнісянь он на вермы, вужйыс сылӧн пыдӧ нин пырӧма да. Сӧмын позис эськӧ войпукан ногсӧ ёна вежны: лёк ногӧн дурӧм пыдди нуӧдны сэнъясын югдӧдчан удж.

Комсомол ячейкаяс да лыддьысян керкаяс уналаын нин кутчысисны тайӧ уджас. Кольӧм воясӧ кӧнсюрӧ войпуканінъясын вӧчавлісны гора лыддьысьӧмъяс. Комсомолечьяс ас костаныс чукӧртлывлісны сьӧм да сы вылӧ судзӧдлывлісны войпуканінъясӧ газетъяс. Лыддьысян керкаясысь вайлывлісны тшӧтш журналъяс, газетъяс да нигаяс. Тыдовтчыліс войпуканінъясын югдӧдчан удж.

Таво войпуканінъясын югдӧдчан уджтӧ ковмас бурджыка нин лӧсьӧдны. Комсомол ячейкаяслы колӧ асланыс собранньӧяс вылын бурджыка сёрнитны, кыдзи комсомолечьяслы нуӧдны войпуканінъясас югдӧдчан уджсӧ. Вӧлӧсьтысь став войпуканінсӧ колӧ лыд вылӧ босьтны. Тӧдмавны, кутшӧмджык ныв-зон кӧні войпукӧны, кутшӧма найӧ велӧдчӧмаӧсь, мыйджык на пӧвстын позьӧ нуӧдны.

Ас сиктса комсомолечьяслы колӧ пуктыны югдӧдчан удж. Избачлы колӧ бӧрйыны лыддьысян керкаысь том йӧзлы кажитчанаджык нига-газетъяс да журналъяс. Сетлыны найӧс сиктса комсомолечьясыслы. Нывъяс зэв радейтӧны велӧдчыны сьывны. Уна нин эмӧсь сьыланкывъясыд, найӧс колӧ разӧдны том йӧз пӧвстӧ. Коми сьыланкывъястӧ ёна лэдзӧны „Ордымӧ“. Колӧ зільны разӧдны сійӧс войпуканінъясӧ. Избачлы, школаын велӧдысьяслы, пельшӧрлы да мукӧд удж нуӧдысьяслы колӧ отсавны сиктса комсомолечьяслы тайӧ югдӧдчан уджсӧ лӧсьӧдны.

Комсомол ячейкалы, лыддьысян керкалы колӧ ас дінаныс матыстӧдны гудӧкасьысь том йӧзӧс. Сиктад ӧд том йӧзыд гудӧктӧ ёна радейтӧны. Лӧсьӧдан кӧ гудӧкасьысьяслы кружок, найӧ унатор велӧдчасны ворсны. „Самоучитель“ вермасны судзӧдны. Татшӧм кружок лӧсьӧдӧм, гудӧкасьысьясӧс лыддьысян керка бердӧ, комсомол дінӧ матыстӧмӧн, югдӧдчан уджтӧ позьӧ войпуканінад бурджыка пуктыны. Уна выль сьыланкывъяс позьӧ том йӧз пӧвстӧ разӧдны.

Кутшӧм комсомолечьяслы войпуканінъяс индӧма, колӧ уджалӧм йывсьыс отчёт корны. Найӧ сэки сьӧлӧмсьысджык босьтчасны удж бердас да тшӧкыдджыка кутасны войпуканінас ветлывлыны, гора лыддьысьӧмъяс, сёрнияс сэні нуӧдны. Комсомолечьясыд кӧ бура асьнысӧ войпуканінад пондасны видзны, на вылӧ видзӧдӧмӧн и беспартийнӧй том йӧзыс оз кутны кыдзсюрӧ овны.

Войпуканінъяс пыр, бура сэні удж пуктӧмӧн, комсомол сибӧдас том йӧзӧс ас бердас, вайӧдас найӧс лыддьысян керкаӧ, велӧдас, кыдзи бура, аслыныс пӧльза вылӧ, том йӧзлы прӧст кадсӧ колльӧдны.

Й. Ӧ.