КЫДЗИ КОЛӦ ВИДЗНЫ НЁНЬӦДЧЫСЬ КӦБЫЛА ВӦЛӦС

(Дженьыдика индӧдъяс)

Ичӧт чань первой вонас босьтӧ сёянсӧ медъёна аслас мам помысь. Сы вӧсна колӧ тӧждысьны кӧбылаӧс бурджыка видзӧм понда. Оз ков кольччыны сӧмын ӧти бур кӧрымӧн. Бура вердӧмысь кындзи, нёньӧдчысь кӧбылаӧн колӧ бура вӧдитчыны, ёна видзны сійӧс уджалігӧн. Кӧбылалӧн медъёна омӧльтчӧмыс овлӧ: вывті сьӧкыд удж помысь, нӧйтӧмысь, вывті дыр кежлӧ аслас чань дінысь торйӧдлӧмысь. Ставыс тайӧ лёкмӧдӧ, дӧзмӧдӧ кӧбылаӧс, — сійӧн этшаджык, омӧльджык лоӧ сылӧн йӧлыс.

Чанясьӧм бӧрын кӧбылаӧс колӧ вежон кык кежлӧ, либӧ куим кежлӧ дугӧдлыны уджысь.

Быд лун кӧбыла мамӧс да чаньӧс колӧ лэдзлыны ывлаӧ пальӧдчыштны. Сӧмын кӧдзыд дырйи да зэра поводдяӧ колӧ видзны гидняын.

Вердны колӧ кӧбылаӧс чанясьӧм бӧрас медводдза вежонын дрӧбитӧм идйӧн, шырӧм идзас сора ӧтрубӧн да бур турунӧн. Зӧрйӧн вердны тайӧ кадын оз позь.

Чанясьӧм бӧрын первой вежоннас, кӧбылаӧс колӧ кокньыдика уджӧдны (уджавнысӧ кӧ кутан, бурджык эськӧ дерт, не уджавны) горт гӧгӧрса уджъяс вылын, мед эськӧ позис унджыкысь лэдзлыны сы дінӧ чаньӧс. Чаньӧс куим вежон гӧгӧр бурджык не лэдзны уджалігӧн мамыс дінӧ. Мамӧс оз ков уджӧдны пӧсявтӧдз. Некутшӧма оз ков лэдзны чаньӧс нёнявны мамсӧ пӧсь вывсьыс да мудз вывсьыс, либӧ ёна ветлӧдлӧм бӧрын: тайӧ кадӧ йӧв помысь вермас чаньлы лоны омӧльтор.

Чаньӧс, кымын быдмӧ, сымын колӧ шочджыка лэдзлыны мам дінас; сӧмын некутшӧм ногӧн оз ков дзикӧдзсӧ торйӧдны куим тӧлысьысь водзджык. Зэв бур нёньӧдны чаньӧс 5–6 тӧлысь.

Н. Ч.