НЕКОР ОЗ ВУН...

Пабриклӧн, заводлӧн
Шы ни тӧв сулалӧм,
Пулялӧн, вой тӧв моз,
Лёк ногӧн шутьлялӧм
Некор оз вун.
Чорыда киясын
Винтовка кутӧмыс,
Бокӧвӧй горш йӧзӧс
Ас муысь вӧтлӧмыс
Некор оз вун.
Лёк олӧм путкыльтӧм,
Выль олӧм лӧсьӧдӧм,
Аспытшса лёк йӧзкӧд
Чорыда вермасьӧм
Некор оз вун.
Тшыглункӧд, гӧльлункӧд
Ӧтулысь водзсасьӧм,
Быдсяма пикъясысь
Ас вынӧн мездысьӧм
Некор оз вун.
Эгӧ тай вошласьӧй
Мездлунтӧ корсигӧн,
Эгӧ тай повзьылӧй
Важ олӧм вежигӧн...
Некор оз вун.
Шы ни тӧв сулалысь
Заводъяс вӧрзьӧдім,
Тшыкӧмин, сімӧмин
Мавталім, лӧсьӧдім...
Некор оз вун.