МЫЙЛА МУСА КОМИ АНЬ

Мича коми нылӧй,
Меным тэ зэв муса,
Ёна муса меным
Тэнад гажа олӧм.
Тэ моз сьывны, ворсны,
Мича зарни нылӧй,
Оз куж сэсся некод,
Пӧрысьяс ни томъяс.
Ичӧтик на вӧлін,
Муртса кывйыд артмӧ,
Пыскыльтан, а сьылан
Долыд олӧм йывсьыд.
Быдмин сизим арӧдз,
Ывла вылын ветлан;
Дойдін ичӧт коктӧ,
Синва банӧн бӧрдан.
Кодкӧ сэки сьывны
Нывъяс пиысь босьтіс,
Бӧрдӧм тэнад вуні,
Накӧд кутін сьывны.
Тыри дас квайт арӧс:
Праздник кодь кӧ воас,
Улич вылын тэнад
Юргӧ сьылӧм шыыд.
Сэки тэныд долыд,
Сьӧлӧм вылад кокньыд,
Чужӧм вылад вира,
Кӧмкот, платтьӧ мича.
Кызь арӧсӧ воин,
Верӧс сайӧ мунін.
Сэки кутін овны
Аснад мужик дінын.
Ас кодьыд жӧ нылӧс
Отсӧг вылӧ быдтан,
Потан дорын сылы
Мыйяс кужан сьылан.
Пӧрысьладор босьтіс — 
Ветымынӧ тыртчан,
Кӧтшас лабич вылын
Дӧмсигмозыд мурзан.
Он нин важ моз горӧд,
Нюркнитӧмӧн нюжӧд,
Сӧмын мыйкӧ, век жӧ
Сьылӧмтӧ он вунӧд.
Кӧть и аньлӧн олӧм
Помӧ пондас воны,
Сьылӧмсьыд тай сійӧ
Оз на дзикӧдз лэдзсьы.
Нэм чӧжыд тэ, аньӧй,
Уна верман сьывны,
Ассьыд шог и долыд
Сьыланкывйӧ босьтны.
Сійӧн тэ и муса
Меным, коми аньӧй,
Тэкӧд меным долыд,
Вунӧ аслам шогӧй.