ЭЖВА Ю КУЗЯ

Эжва ю кузя,
Тэрыб гы вывті
Лэбзьӧ ыджыд пыж
Еджыд паруса.
Пыжас пукалӧ
Дас вит удал зон,
Ӧти зон кындзи,
Ставыс гажаӧсь.
Найӧ ворсӧны
Куим гудӧкӧн,
Найӧ сьылӧны
Дас нёль гӧлӧсӧн.
Ӧти бурлак морт
Мича чужӧма,
Арся кымӧр моз,
Ваас видзӧдӧ.
Юрсӧ лэдзӧма,
Оз и лэптыштлы,
Вомсӧ тупкӧма,
Оз и горӧдлы.
Мыйла, бурлак морт,
Тадзи жугыльтчин?
Мыйла ёртъяскӧд
Тэ он гажӧдчы?
Кинас шеныштіс
Шогсьысь бурлак морт,
Шуис-горӧдіс
Нора гӧлӧсӧн:
„Дона ёртъясӧй,
Удал зонъясӧй,
Энӧ дивитӧй,
Энӧ лӧгасьӧй!
Менам сьӧлӧмӧй
Шогӧн тырӧма,
Менам долыдлун
Ылӧ кольӧма!
Муса Машукӧй
Менӧ эновтіс,
Югыд шондіӧй
Менам кусӧма!
Босьтӧй шыбитӧй
Менӧ, коньӧрӧс,
Гудыр ва пытшкӧ,
Джуджыд кыркӧтшӧ!
Ме кӧ мустӧмми
Муса Машуклы,
Овны му вылын
Меным нинӧмла!..“