МЕДБӦРЪЯ ВӦТ

Гӧрд армия лёк еджыдъясӧс зырӧ.
Оз ланьтлы сэн скӧр пушкаяслӧн гым.
Ме лыйся тшӧтш, мед еджыд котыр бырӧ,
Мед оз нин коль роч муын налӧн ним.
Да уси ме: кык пуля чушкис менӧ,
Кык пуля мем, том мортлы, вӧчис пом...
Тэ кӧні, полк? Ог аддзывлы нин тэнӧ.
Гӧрд сьыланкыв оз горӧдлы нин вом.
Зэв сьӧкыд мем. Пӧсь вирӧй менам киссьӧ,
Оз лэптысь юр, оз вӧрзьы ки ни кок.
Кӧн куйла ме, став муыс вирнас мыссьӧ...
Эн виччысь, полк, ме татысь ог нин лок!
Ме кула тан, ме сотчӧм сись моз куса.
Лёк, мисьтӧм смерт мем овны оз нин сет.
Кӧн бара тэ, код меным медся муса?
Ме аддзи сэк медбӧръя кулан вӧт.
Ме аддзи вӧт: со менам чужан муӧй.
Со миян сикт. Быд йӧрын быдмӧ нянь.
Со карӧ туй. Со югыд паськыд юӧй.
Со вадорвыв. Сэн бӧрдӧ мича ань.
Мем тайӧ ань став донаторсьыс дона.
Мый бӧрдан тэ, мый шогсян, сьӧлӧмшӧр?
Эн синва кисьт, эн шогсьы вывті ёна.
Со ворсанін. Мун ворсан уджсӧ кер!
Пыр бӧрдӧ ань; том сьӧлӧм сылӧн тӧдӧ,
Кыдз уси тан гӧрд армиялӧн пи,
Кыдз куйла ме, кыдз лолӧй менам петӧ,
Кыдз сэсся нэм ог аддзысьлӧй нин ми!..