ШОР

Ок, тэ, шорӧй,
Менам шорӧй,
Изъяс пӧвстӧд чольган;
Гуся сьыланкывъяс нора
Он и мудзлы гольган.
Кор ме ӧні
Дінад пукся,
Кывза тэнсьыд сьылӧм,
Пыр и думӧй вылӧ усьӧ
Челядь олӧм-вылӧм.
Кыдзи сэки,
Ичӧтдырйи,
Ставным ӧткодь чукӧр,
Гажа лунӧ,
Ворсігтырйи,
Босьтам гута вугыр;
„Ю аръяслы“,
Кыркӧтш дорӧ,
Самалам да чӧвтам.
Либӧ асьным
Пырам шорӧ,
Льӧмпу пожйӧн кӧвтам.
Чери вӧлі шедӧ уна,
Каньлы сэсся ваям;
Он и тӧдлы
Луныд мунӧ,
Гортӧ сёрӧн каям.
Мукӧддырйи
Гулю чуньяс,
Каля изъяс ӧктам;
Оз-ӧ кынмы
Сэки чуньяс,
Котралам да йӧктам.
Либӧ перъям
Вӧлі няша
Помны видзвыв шорсӧ;
Бызган дорын
Ёна гажа,
Купайтчам да горзам.
Батькӧд пемыд
Арся войын
Пу зыр, „азьлас“ босьтам,
Лэччам кыбны
Горт дін чойӧд,
Полӧмыд сэк босьтӧ...
Ок, тэ, шорӧй,
Менам шорӧй,
Тӧда тэнсьыд сьылӧм;
Тэӧй менсьым
Сьылан нора
Челядь олӧм-вылӧм.