А. А. СУХАНОВА

Телеграф вайис дженьыдик юӧр: «Август 13 лунӧ Москваын кувсис Агния Андреевна Суханова».

Тайӧ юӧрыс дойдас сьӧлӧмсӧ быдӧнлысь, коді тӧдліс Агния Андреевнаӧс кыдзи вынсӧ жалиттӧг уджалысьӧс да бур мортӧс. Сійӧ ачыс — коми крестьяна пӧвстысь петӧм морт, и пыр кыліс сьӧлӧм дойсӧ миян пемыдлун вӧсна. Кыдзи сиктса учительница, сійӧ медводдзаяс лыдын босьтчис коми школа лӧсьӧдӧмӧ.

1918 воын на Кӧрткерӧсын уджалігӧн сійӧ М. И. Лебедевкӧд ӧтлаын заводитӧ лӧсьӧдны чужан кыв вылын литература, котыртӧ неыджыд кружок, коді заводитӧ петкӧдлыны сиктын медводдза коми спектакльяс.

1919 воын Агния Андреевна уджалӧ Коми комиссияын, а 1920 восянь — Коми издательствоын. Сылӧн мудзлытӧм тӧждысьӧмӧн лӧсьӧдӧма ӧнӧдз школалы став коми литературасӧ.

Кыдзи морт, Агния Андреевна вӧлі зэв прӧстӧй, йӧз дінӧ сибалысь, лышкыд сьӧлӧма и сэк жӧ асьсӧ некор эз зіль петкӧдлыны вывті тӧдысьӧн да кужысьӧн. Помнита, кыдзи 1919 воын учительяслысь съезд нуӧдігӧн, кор зэв на этша гӧлӧс кывліс школаӧ коми кыв пыртӧм вӧсна, Агния Андреевна веніс ассьыс полӧмсӧ да висьталіс пӧсь кывъяс коми школа вӧсна. Сылӧн кывъясыс йиджисны сьӧлӧмас уна мукӧд учительяслы.

Кадыс сэки корис уджавны вынъяс жалиттӧг, и сійӧ уджаліс, аслас слаб здоровье вылӧ видзӧдтӧг, и висьмис туберкулёзӧн.

Тавося гожӧмын Агния Андреевна муніс Башкирияӧ бурдӧдчыны кумысӧн, но здоровьеыс ещӧ ёнджыка омӧльтчис и сійӧс мӧдӧдісны Москваӧ. Но сэні эз нин вермыны отсавны...

Литератураын коймӧд уджалысьӧс нетшыштіс миян радъясысь туберкулёз. Тайӧ висьӧмыс нуис нин кадысь водз Иона Тимофеевич Чисталёвӧс да Фёдор Васильевич Поповӧс. А ӧні Агния Андреевна Сухановалӧн олӧмысь мунӧмыс мед жӧ лоӧ ӧлӧдӧмӧн коми литератураын мукӧд уджалысьяслы: Ёнджыка тӧждысьӧй асланыд здоровье вӧсна! Видзӧй асьнытӧ ӧнія сьӧкыд кадса висьӧмысь!

Талунъя том войтырлы колӧ вежны коми литераторъясӧс, кодъяс мунісны олӧмсьыс ыджыд уджсӧ заводитігӧн на. Мед жӧ на местаӧ сувтасны не ӧти дас на кодь жӧ уджалысьяс!