КОМИ ЙӦЗЛЫ...

Важӧн, кор миян вылын вӧліны ыджыд кык пӧлӧс ен: небесаса и мувывса, комиясӧс эз морт пыдди пуктывны. А коми кыв йылысь нинӧм и шуны: “сійӧ пӧ пон кыв”. Кор мувывса енмӧс шыбитісны да накӧд став вир юысьсӧ, да кор коньӧр мортыс, уджалысь мортыс, тшыгъялысьыс лои ыджыдын, коми кывйӧс кутісны ловзьӧдны. Сійӧ заводитӧма нин вӧлі ӧтарӧ лолавны, ӧні бӧр кутіс ловзьыны. Толькӧ роч йӧзъяс, дерт, оз любитны коми кыв, но налы позьӧ прӧститны. А ӧд мукӧд коми мортыс коми кывсӧ пельнас оз вермы кывзыныс, коді петіс коми йӧз письыс, коді быдмис коми мам морӧс дорын. Вокъяс, синваыд петӧ сыысь. Мый понда сійӧ позьӧ кӧ эськӧ йирыштас коми кывсӧ да биӧн сотас? Вокъяс! Ті, гашкӧ, вермад висьтавны, а ме ог. Уна эм коді босьтӧ бур коми йӧзлысь, ачыс омӧль вӧчӧ налы. Бур вылӧ мынтӧ лёкӧн. Ӧні сэтшӧмыслы абу места коми йӧз пиын. Найӧс колӧ вӧтлыны. Ӧні коми кыв велӧдӧны школаясын. Кодлы муса коми кыв, сылӧн сьӧлӧм чеччӧ. Ӧд коми кыв, войдӧр кодӧс шулісны “пон кывйӧн”, велӧдӧны школаын. Сыысь бурторйыс абу коми мортлы. И уна эм школа пиын, коді велӧдӧ коми кыв ас вӧля вывтіыс, коді шуӧ: “Му пыр пӧ мед мунас коми кыв” (шуӧ рочӧн). Вот сэтшӧмъясыслы абу местаыс школаас.

Сыктывкарын эм семинария. Быдӧн тӧдӧны, мый лӧсьӧдӧ учительясӧс, коді челядьӧс коми мортлысь велӧдӧ, да ещӧ асьсӧ велӧдӧ. Оз ӧд прӧста шуны йӧзӧс велӧдысьӧн (народный учитель). Налы колӧ коми кывсӧ отсавны ловзьӧдны. А ёна шог, коймӧд юкӧныс абу, коді кыв понда тӧждысьӧ. Шог... и яндзим семинария водз.

Пасибӧ — бур велӧдысьыс веськалі школаас, сійӧ ёна дорйис коми кыв, ас сёрниас коми кыв дор унаӧс бергӧдіс.