***

Кык во нин кольны кутіс сы кадсянь, кор разьсисны чепъяс, воссисны вомъяс сё пӧлӧс Россияын олысь йӧзъяслӧн. Мӧд во вылӧ нин петіс кор уджалысь морт сьылі вывсьыс шыбитіс капитал, таляліс кок улас. Петны кутіс шонді, мича югыд шонді. Разавны югыдыс кутіс Россия пасьта... воис Коми муӧ.

Сэки Коми муын вӧлі арся пемыд вой. Сарлӧн палачьяс, вир юысьяс, буретш вӧлі личкӧмаӧсь коми йӧзӧс, кисӧ-коксӧ дорӧмаӧсь, — кӧсйӧны вундыны горшсӧ.

Но друг югдіс, — палачьяслӧн кисьыс пуртныс мыні.

Коми йӧз куйлан коли, кӧрталӧм ки-кокӧн эз вермы чеччыны, шыбласис-пессис.

Ыджыд вокыс, интеллигенция, видзӧдліс коми йӧз пессьӧм вылӧ, сьӧвзис да шуис: “Мед пропадитас!” Коми йӧзӧс уна сё во яндысьтӧг виисны и эз вермыны вины. Ӧні эз “пропадит” — ловъя коли. Аслас багатыр кинас орйӧдліс кӧртӧдъяс... чеччыны кӧсйӧ...

Повзисны баринъяс-интеллигентъяс, юрсиныс сувтся сувтіс, кутісны ас костаныс вашкӧдчыны: “А что если и на самом деле нам придется разговаривать в школах и в других учреждениях на собачьем языке?!”

Повзисны и коми йӧз пытшкысь кодкӧ-кодкӧ, шуӧны: “Коми йӧз кӧ сувтас да “автономия” кутас корны, кысь ми сійӧс сетам! Колӧ, мед вӧлі интернационал. Автономия йылысь оз и позь сёрнитны...”

Но коми йӧз чеччӧ... Джуджыд гӧра йылын дзирдалӧ югыд интернационал. Коми йӧз мунӧ веськыда, ас кокнас кӧсйӧ кайны сійӧ гӧра йылас!

Вешйӧ туй шӧрсьыс, “лжеинтернационалистъяс”! Лэдзӧ коми йӧзлы кайны ас кокнас, ас выннас Интернационал гӧра йылӧ!