ВЫЛЬ ВО

Дугдывтӧг гартчӧны
Шондіа кытшъяс,
Сувтлытӧг котӧртӧ
Во бӧрся во.
Чайтсьӧ, мый бурторйыс
Быдӧнлы вичмас,
Коркӧ и лёкторйыс
Некӧн оз ло.
Турӧбӧн, лым сорӧн
Локтӧма татчӧ
Варов, гӧрд бандзиба
Дзоляник зон.
Ветлӧдлӧ, гажӧдчӧ,
Йӧз дорын гартчӧ,
Кыпӧдӧ вылӧджык
Выль волысь дон.
«Выль воӧн!» — горӧдчам
Друглы да ёртлы,
Сиам став сьӧлӧмсянь
Шуд да кузь нэм,
Сюрас мед быдлаысь
Уджалысь мортлы
Бурыс да лӧсьыдыс,
Мый сӧмын эм.
Сиам: став йӧзыслы
Радпырысь овны,
Мед эськӧ гажтӧмлун
Некӧн эз вӧв;
Мунысьлы —
Туй помӧ регыдджык воны,
Локтысьлы —
Кокньыда колльӧдны тӧв.
Сиам ми ӧтвылысь:
Планъяслы тырӧм;
Томъяслы —
Туйяс да бур оланін;
Пӧрысьлы —
Кокньыда выль воӧ пырӧм;
Миян салдатъяслы —
Збойлун да вын.