СТРӦИТЕЛЬ

Весиг сувтлытӧг, тупкыса синмӧн
Тэ кӧ войтырлань нюжӧдан китӧ,
Сета кык вылӧ сёӧс, мый инман
Мортлы, кодлӧн эм тэкӧд бур йитӧд.
Но ме вӧзйыся висьтавны тіян,
Кутшӧм сёрни стрӧителькӧд вӧлі,
Кутшӧм ёнӧсь стрӧительлӧн пиян,
Кутшӧм мог найӧс кыпӧдӧ ӧні.
Сылысь юала: «Мый понда муса
Гырысь керкаяс лунысь-лун тэчны?
Меным кажитчӧ, вывсянь ме уся,
Мыйкӧ ковмас кӧ сэні мен вӧчны».
И стрӧительсянь воча кыв кыла:
«Пыр кӧ мортыдлы усьӧмысь повны,
Сэк ни лэбны, ни видзӧдны вывлань,
Гажтӧм лоас и му вылас овны».
Шуа: «Стенъястӧ тэчигӧн тэнӧ
Ньӧти жалиттӧг курччалӧ тӧлыс.
Мед кӧть мырдысьӧн йӧткасны менӧ,
Вын оз тырмы тан уджавны тӧлысь».
Кыла воча кыв: «Коді нӧ тэчас
Керка стенъяссӧ арнас да тӧвнас,
Коді йӧзыслы оланін вӧчас,
Корсьны быдӧн кӧ шоныдін мӧдас?»
«Ёна ышӧдӧ удждоныд, гашкӧ?» —
Сылысь бара на тӧдмавны кӧсъя...
Кыла: «Удждоныд удж серти дасьмӧ —
Сымын бур, кымын уджалан пӧся.
Весиг дивуйтча тэ вылӧ, ёртӧй,
Мый он гӧгӧрво менсьым тэ уджӧс.
Сійӧ менам и муслун, и бордйӧй,
Сійӧ ме ордӧ батьсянь на вуджис».