БИА СЬӦЛӦМ

Войвыв юыс олӧ ассьыс олӧм,
Сӧстӧм васӧ йӧзлы юны вӧзйӧ.
Гожӧм шӧрын мырсьӧ дзоля лолӧн,
Тувсов кадӧ ставсӧ вӧйтны кӧсйӧ.
Бадьяс пӧвстӧдз кайӧ еджыд быгнас,
Вомӧнавлӧ веретяа видзьяс.
Кывтыд помнас рытъя кыа пыкас,
Катыдыслы асъя кыа вичмас.
Ягдор сиктысь талун пыжа петӧ.
Колльӧдчысьяс локтӧмаӧсь тырыс.
Кодкӧ кутлӧ, кодкӧ сьӧлӧм сетӧ,
Кодлӧнкӧ — оз артмав весиг кылыс.
Пӧрысь бабыс горзӧ пӧрысь дедлы:
«Быть мӧй аслыд мунны вӧлі колӧ?
Эн жӧ пыжсӧ вывті ёна вӧтлы —
Быдсямаыс ытва дырйи лолӧ!»
Баблысь кисӧ внукыс киас босьтлӧ:
Эн пӧ шогсьы — аски бӧр нин воам.
Сывсӧ сэсся невесталы восьтлӧ:
Аскисянь пӧ — ӧтлаынӧсь лоам.
Сьӧлӧмнысӧ жӧник да невеста
Некыдзикӧн ланьтӧдны оз кужны.
Бипуртӧ кӧ радейтчӧмлысь ӧзтан,
Лунсӧ ӧта-мӧдтӧг сьӧкыд вуджны.
Пыжынӧсь тшӧтш арлыдаа аньяс:
Сиктса врач да вузасьысь сельпоысь.
Сёрни-басни йӧзлӧн регыд ланьтас
Выль моторлӧн варовитан горысь.
Пыж нин вӧчис шӧрлань петан чукыль.
Тӧлыс быттьӧ кывтысьяссӧ нюлӧ.
Тӧкӧтьыштӧ сьӧлӧм вылын жугыль...
Вына мышкыс потӧ паськыд юлӧн.
Кывтӧ сэн жӧ пыжын дедлӧн внучка —
Ыджыд нывлӧн медся ичӧт нылыс...
Гӧгӧр быттьӧ ставыс ладнӧ-лючки,
Донъявны бур олӧм оз сюр кылыс.
Вывлань резсьӧ посни бусӧн ваыс,
Ворсӧ сійӧ ӧшкамӧшка бордйӧн.
Пыжлӧн мунӧм оз дерт торксьы таысь,
Сьӧлӧм сӧмын ышалыштӧ мортлӧн.
Завидьтымӧн бура талун пуктӧ
Дзормӧм дедыс пыжлы кывтан визьсӧ, —
Тӧвзьӧдӧ райцентрӧ ассьыс внуксӧ
И оз норась, сьӧлӧмыс кӧть висьӧ.
Зонлы кызь квайт ар, но агроном нин,
Бура тӧдӧ му дор уджлысь муртӧс.
И вот талун партбилет райкомын
Сьӧлӧм бердас аслыс сійӧ пуктас.
Недыр нин райцентрӧдз кывтны колис.
Шонді сора луныс йӧзлы ладмӧ.
Сьӧлӧм пиас зонлӧн эскӧм оліс:
Кывтан туйсӧ нинӧм нин оз падмӧд.
Сӧмын ставыс мӧд ногӧн тай артмис:
Дӧзмис, гашкӧ, паськыд тувсов юыс,
Юрсӧ дедлысь шонді, гашкӧ, гартіс,
Кыдзкӧ, гашкӧ, пыркнитчыштліс муыс...
Вывлань нырӧн пыжыс вӧв моз сувтліс,
Сэсся боквыв дзуртыштӧмӧн пӧри...
Пуртӧн моз жӧ кӧдзыд ваыс вундіс:
Повзьӧмыс и дойыс — ставыс шӧри.
Пакӧсьт вӧчысь — сувтсӧн кывтысь керйыс —
Чӧла вешйис: сылы ставыс веськодь.
Коді бара ягсьыс сійӧс перйис?
Мыйла туйсӧ мӧдлаӧ эз веськӧд?!
Кӧртысь вӧчӧм пыжыд кӧть и крепыд,
Путкыльтчас кӧ, отсӧг абу сыысь.
Мортлы вошны ытва дырйи — регыд,
Визулыс кӧ вынсӧ босьтас сылысь.
Ичӧт чойыс, нывбабаяс, дедыс, —
Ваынӧсь. Он гӧгӧрво, мый вӧчны.
Зонмыс ӧтнас тані — отсӧг сетысь...
Кӧм да паськӧм уявны оз лэдзны...
Берег дорӧ некод на эз сибав:
Аньяс дедкӧд — ӧшйӧмаӧсь пуӧ;
Ичӧт чой ва веркӧсас эз кыпав,
Воклӧн сотчӧ сьӧлӧм, вирыс пуӧ.
Петіс жӧ тай жальыс визув юлӧн:
Ичӧт чойлысь вокыс лэптӧ юрсӧ;
Мед оз личкы унмыс мортсӧ мулань,
Вӧзйӧ сылы быд ног олӧм бурсӧ.
Повзьӧм гӧлӧс ю выв эрдсӧ кырліс:
«Вынным быри! Кутӧй! Вӧям татчӧ!»
Зонлӧн юрыс ӧтик мӧвпӧн тырис:
«Отсавны быть колӧ, кув кӧть ачыд!»
Некыдзи оз лэччысь дедыс пуысь,
Ӧдва вермис внукыс сійӧс босьтны.
Би выв пӧртйын моз жӧ ваыс пуис,
Юлысь пыдӧс кӧсйис быттьӧ восьтны.
Эбӧсыс тай зонлӧн эз на личав —
Удайтчис на дедсӧ кутны сылы.
Ӧзйӧ шонді сэтшӧм пӧсь да мича —
Весиг быттьӧ енэж шӧрыс сылӧ.
Мыйӧн сӧмын врачлӧн мыні киыс,
Вӧйтны мӧдіс ваӧн тырӧм кӧмыс.
Суӧдіс да кыскис зонмыс сійӧс,
Кӧть и пемдіс аслас шонді рӧмыс...
Врачлы муртса берег дорыс сюрис,
Вузасьысьӧс визув ваыс нуис.
Зон эз повзьы, кӧдзыдыс кӧть пурис,
Вӧйысь аньлань тэрмасьӧмӧн уйис.
Дивуйтчис, но коли юыс чӧлӧн.
Нывбабаӧс смертьысь дорйис зонмыс,
Сӧмын сэк жӧ кусіс аслас сьӧлӧм —
Ловъя войтыр вӧлі сылӧн доныс.
Ловъя мортлы югыд шонді муса.
Зонлы сӧмын ставыс веськодь ӧні.
Нинӧм туйӧ пуктіс тувсов юсӧ,
Ыджыд вынсӧ кӧсйис сылысь венны.
Партбилетсӧ кӧть эз удит босьтны,
Вӧлі коммунистӧн сьӧлӧм дойнас.
Ставнас кӧть эз удит асьсӧ восьтны,
Йӧзлы сійӧ талун медся дона.
Бӧрдіс мамыс, невестаыс бӧрдіс.
Батьыс весиг местаас эз инась.
Вӧръяс сайӧ тувсов шонді бердіс.
Другъясыслӧн кӧтасисны синъяс.
Дедлӧн горзӧ пытшкӧсыс и ортсыс —
Сэтшӧм ёна шогыс сійӧс венӧ:
«Мед не дзебны гуӧ том-бур мортӧс,
Колӧ вӧлі ваас кольны менӧ!»