ЗЭВ МАТЫССА МОРТ

Чужис Володя Ульянов Симбирскын.
Быдмис Россияын миян Ильич.
Кытшовтіс Ленинлӧн нимыс став мирсӧ,
Вайис быд олысьлы олӧмас мич.

Фото. Ульяновъяс. Син водзын менам
Мамыс и батьыс, и чой-вокыс тшӧтш...
Неыджыд детинка видзӧдӧ мелань —
Некор ог вунӧдлы, мый кӧть ог вӧч!

Вужъяссьӧ сьӧлӧмӧ виччысьтӧм муслун,
Эновтны снимоксӧ вынйӧр оз сюр.
Морӧсын ыпъялысь биыс оз куслы,
Тэрмасьысь мӧвпъясӧн гажӧдчӧ юр.

Видлала снимоксӧ... Сьӧлӧмӧ курта
Бурсӧ, мый аддза да казяла сэсь.
Висьӧмысь сэки ме быттьӧкӧ бурда,
Ывлаыс гажмӧ и енэжыс сэзь.

Кужа ме йӧзкӧд тшӧтш сьӧкыдсӧ венны
Сійӧн, мый Ленин — зэв матысса морт:
Сылы моз сувтӧ Россияыс меным,
Кыдзи ас чужанін, аслам бур горт.