РУАЛӦ МОЗЫН

Руалӧ Мозын да морелань нуӧ
Нюрвывса ваяслысь сӧдзӧдӧм лов,
Косьясын скӧралӧ, гартчӧмӧн пуӧ...
Узьӧм ни шойччыштӧм сылы оз ков.
Лӧзалысь вӧръяса гӧраяс сайын
Мичлуныс юлӧн быд чукыльын тыр.
Гожӧмбыд кыасӧ визувтысь ваын
Енэжыс мудзлытӧг пожъялӧ пыр.
Вӧр-васӧ поткӧдӧ увсянь и вывсянь
Пелькиник пыжъяслӧн зэлалӧм гор.
Татӧні олысьӧс, важӧн нин кывсьӧ,
Ветлӧмысь-мунӧмысь нинӧм оз сор.
Весигтӧ юйывса ичӧтик сиктъяс
Каръяскӧд ӧтмоза ӧзтӧны би.
Радпырысь видзӧдӧ олӧмлы синмас
Тасдорса войтырлӧн вынйӧра пи.
Пукала пыж шӧрын, ю вывті лэба,
Гыалысь радлунӧс кутны ог куж.
Орласьысь визулыс водзсасьӧ жеба,
Быттьӧкӧ вежӧдысь турунлӧн вуж.
Колины косьяс да чукыльяс юлӧн,
Ылісянь тыдовтчис Косланлӧн мыльк...
Тӧдса мен серпасыс татчӧсса мулӧн,
Тӧдчӧ кӧть олӧмыс ставнас тан выль.
Мозынлысь, быттьӧкӧ невеста нывлысь,
Паськыд шӧвк вӧньӧн моз зэлӧдӧ кос
Гырысь машинаяс гӧлӧсӧн сьылысь
Лӧзов бетонысь нэм вӧрзьывтӧм пос.
Муна, болгаръяслысь сёрнисӧ кыла,
Аддза посёлок Благоево тась;
А Усогорскӧ ме, муртсысь, эг ылав —
Весигтӧ кольччыны вӧлі нин дась.
Послы да дружбалы нэм пом оз тыдав,
Уджвывса пӧсьлунысь шоналӧ тӧв.
Войтырлӧн йитӧдъяс помасьтӧм лыда,
Отсӧгыс гаровтчӧ зэв уна пӧв.
Ывлаыс гажа, кӧть сувтӧма ар нин,
Лун тӧлыс косявлӧ ювывса ру.
Тӧдӧ Болгария пармалысь зарни,
Тӧдса Софиялы Мозындор му.
Мозындор казьтылӧм важӧн нин менсьым
Вӧрзьӧдӧ сьӧлӧм да руӧдӧ син.
Сэтчӧсса войтырлӧн бурлунӧн шензьӧм,
Тӧдӧмысь, некор нин менам оз чин.