ЛАЗЪЯ МИШКА

Быттьӧ чышкыштӧма бордйӧн —
Миян сиктысь морт оз сюр.
Паськыд видз вылын и борйын
Вутшкысь уна турун юр.
Весиг предӧс сельсӧветысь
Колӧ корсьны доза дыр:
Сійӧ видзьяс вылӧ петіс —
Ытшкӧ, куртӧ йӧзкӧд пыр.
Сӧмын ӧтнас Лазъя Мишка
Лун-лун гурйӧ паськыд вӧр,
Тшак да вотӧс гортас кыскӧ,
Локны видз вылӧ оз тӧр.
Эз на ытшкыв, эз на куртлыв,
Эз на вердлыв ньӧти мӧс;
Некор некод дор эз сувтлыв,
Мустӧм сылы сиктса йӧз.
Кытысь воис Лазъя Мишка,
Некод висьтавны оз куж.
Татшӧм дыш да татшӧм мисьтӧм
Эз жӧ миян сиктын чуж.
Быттьӧ чышкыштӧма бордйӧн
Миян сиктсӧ страдна кад.
Сӧмын ӧтнас йӧзысь торйӧн
Лазъя Мишка ветлӧ тат.