ПАСЬКӦМ

Дӧмаса паськӧмтӧ
Бур туйӧ пасьтавны
Талун нин, тыдалӧ,
Некод оз кут.
Быдӧн выль новлантор
Тэрмасьӧ дасьтыны,
Быттьӧкӧ сы помын
Мортыслӧн шуд.
Карса кӧть сиктса йӧз
Ёна оз майшасьны —
Ӧта-мӧд вежмӧныс
Вӧччӧны пыр.
Кӧсйӧмныс бурджыка
Пасьтӧдны асьнысӧ
Томлӧн кӧть пӧрысьлӧн
Некор оз быр.
Мышсяньыс аддзан да
Тэрмасян суӧдны...
Мӧвпалан: «Тыдалӧ,
Нылыс зэв том!»
Сӧмын на лӧсьӧдчан
Сёрниӧн сувтӧдны,
Тэ вылӧ кальквидзӧ
Пӧрысьмӧм вом.

Нылыс со зон бӧрся
Рытладор тэрмасьӧ,
Чайтӧ, мый суӧдас
Гажлунлысь пай.
Матӧджык матыстчас —
Син весиг пӧртмасьӧ:
Ветлӧдлӧ пӧрысь дед,
Вӧлӧмкӧ тай!
Мый эськӧ ас ног
Не пасьтасьны пӧрысьлы,
Шоныда, небыда...
Том йӧзыс мед
Аскодьсӧ аддзисны,
Ылісянь тӧдісны.
Сэк эськӧ вошласьны
Некод эз мӧд.