КУИМ МОНЬ

Оліс-выліс Сидӧр Вань,
Быдтіс куим пиӧс.
Куим ичмонь — куим ань
Кытшовтісны сійӧс.
Лыда вояс лӧсьыд-бур
Вӧлі моньяс дорын.
Весиг бергӧдчывліс юр
Гажа олӧм горын.
Но... Министрӧдз ыджыд пи
Аслас сямӧн воис.
И судьбалӧн лышкыд ки
Сылы югӧр койис.
Шӧркодь пиыс адвокат,
Тӧдса уна йӧзлы.
Батьыс сьӧлӧмсяньыс рад,
Сё во овны вӧзйӧ.
Медся томыс медся сюсь,
Кӧть и токар сӧмын.
«Улысь, — шуас, — онджык усь,
Ясыдджык юр вемын».
Овлӧ, батьыс броткӧ тадз:
«Ок тэ, неминуча!
Мед кӧть вӧлін эськӧ врач —
Шудсьыд энджык удзав».
Куим шӧртӧн куим пи
Мичмӧдӧны олӧм.
Мамӧн-батьӧн ӧзтӧм би
Сьӧлӧманыс олӧ.
Сӧмын моньяс дорӧд мӧд
Ӧні ветлӧ вуджӧр.
Бура Сидӧр Вань оз тӧд,
Кыдзи лунсӧ вуджӧ.
Ыджыд монь оз чӧвтлы син —
Асьсӧ пуктӧ вылӧ.
Шӧркодь моньыс оз жӧ сын
Батьлань мелі кылӧн.
Ичӧт моньыс — югыд лун —
Мелі, варов, лышкыд.
Вайны чӧскыдтор оз вун —
Быдтор корсяс кыськӧ.
Сидӧр Ваньӧс кортӧм гӧсьт —
Суис сьӧкыд висьӧм.
Ичӧт моньлӧн лолыс пӧсь —
Пӧрысь мортӧс видзӧ.
Сӧмын бур ни лад эз ло —
Радейтантор кувсис.
Сэтшӧм, тыдалӧ, нин во
Сылы таво усис.
Ыджыд моньӧс шог эз босьт,
Шӧркодь эз жӧ бӧрддзы.
Сӧмын ичӧт моньлӧн кось
Сьӧлӧм дойкӧд ӧддзис.
Талун быттьӧ ичӧт чаль
Пӧрӧм пулӧн орис.
Ичӧт моньлы бӧрдмӧн жаль
Батьӧн шуанторйыс.