СЕРАМБАНА СЬЫЛАНКЫВЧастушкаяс, частушкаяс, Частушкаяс, частукъяс, Сьылам, нывъяс-пастушкаяс, Сьылам, зонъяс-пастукъяс. Мыйла бара, лӧддзӧй, дзизган, Мӧслысь торкан кынӧмпӧт? Мыйла бара, зонмӧй, ызган, Нывлы шойччыштны он сет? Мыйла малязі моз чушкан, Мыйла меысь пышъялан? Ньӧба тэныд мича чышъян, Тэ кӧ менӧ окалан. Шорлысь джудждасӧ эг мерайтлы И мерайтны ог кут. Некор зонъясӧс эг окавлы И окавны ог кут. Дзодзӧг лэбӧ, дзодзӧг горзӧ, Дзодзӧг ӧдйӧ саялӧ. Ныв кӧ йӧткӧ дінсьыс зонсӧ — Регыд зонмысь янсалӧ. Уна зон кӧть миян сиктын, Тэ кодь ошйысьысь оз сюр. Мыйӧн нывлы китӧ сетан — Пыр и воштан ассьыд юр. Быд пу вӧрын абу ӧткодь, Быд зон абу ӧткодь сюсь. Видза витсё мӧс ме ӧтнам, Войын тэ вӧсна ог узь. Коньӧрӧй тэ, муса зонмӧй, Он мӧй укшальмӧмысь пов? Гашкӧ, сьӧлӧм тэнад доймӧ, Гашкӧ, сибдалӧ нин лов. Серав, серав, мыйта колӧ, Муса мен и серам шы. Шудӧй тэкӧд орччӧн олӧ, Ог ӧд весьшӧрӧ тадз сьыв. Юяс дорті, вӧръяс дорті Ветлам, мӧсъяс новлӧдлам. Шуд мед миянӧс оз ордйы — Сьывны ёна горӧдлам.
