ТУЙ ВЫЛЫН

Шыльыд туй вывті восьлавны кокньыд,
Он нин, майбырӧй, джӧмды ни усь.
Сӧмын жаявтӧдз мудзӧ жӧ кокыд,
Мунан туйыд кӧ тӧдчымӧн кузь.
Частӧ синъястӧ бӧрвылӧ чӧвтлан,
Думсьыд кодӧскӧ виччысян пыр.
Быд машиналы кияснад ӧвтан,
Кытчӧдз надея дзикӧдз оз быр.
Но машинаяс тэнӧ оз тӧдны
И оз чинтывны мунӧмлысь ӧд.
Веськодь, тыдалӧ, ӧскалӧм кӧртлы,
Коді вӧзйысьӧ — тэ либӧ мӧд.