КӦТЬ КЫТЧӦ МУНА

Ме радейта и эрд, и вӧр,
Из гӧра креж и паськыд море.
Быд карса улич, сиктса йӧр,
Быд олысь менӧ дінас корӧ.
Кӧть Эжва ю, кӧть Волга ю, —
Мен налӧн ваыс ӧткодь чӧскыд.
Рязанскӧй му, кӧть Коми му, —
Быд туй мен быдлаын зэв веськыд.
Кӧть кытчӧ муна — йӧзыс ас,
И позяс лоны колан мортӧн.
Бур уджӧн пуктан ассьыд пас,
И оланіныд лоас гортӧн.
Но чужтіс менӧ коми ань
И ӧввӧ сьыліс коми кылӧн.
Мен тані ставыс мам кодь шань,
Кӧть овла мутӧм-муын ылын.
Ог эскы пӧръясьысьлы, дерт,
Кор кыла сысянь: «Ставыс вуні».
Мен вунӧдчӧмсӧ ваяс смерть,
И мӧдтор ог куж нинӧм шуны.