ЧЕРИ ПӦК

1.

Ачым Гамын ме чужи да быдми,
Уна ныв-зонмӧс тӧдлывлі сэн.
Ӧнӧдз пукта на ставнысӧ пыдди,
Найӧс казьтывны окота мен.
Стап-Ӧнь-Ив, лӧсьыд кытшыльтчӧм уска,
Орчча керкаӧ волывліс дыр.
Сэтчӧс ныв вӧлі вывті нин муса,
Нывнас сьӧлӧмыс Ивӧлӧн тыр.
Ловъя черияс ведраӧн вайӧ,
Мича чышъянӧн козьнасьӧ сэн.
Сылысь мусасӧ шонді оз сайӧд,
Сылысь донасӧ тӧлысь оз вен.
Вӧлі шуасны: «Ив, мый он гӧтрась?»
Мен пӧ гӧтрасьтӧг Аннаыс бур.
Талун любитас, лун мысти вӧтлас.
Сӧмын мусаджык сыысь оз сюр.

2.

Чери пӧк вылад кӧлассис кага.
Анна быдтысис, ёна эз бӧрд.
Сӧмын ныв шогыс сылӧн эз пактав,
Кытчӧдз котравны пиыс эз мӧд.
Ив, пыр важ мозыс, тшӧкыда волӧ,
Сӧмын гӧтрасьны некыдз оз письт.
Мунӧ путкыльтчӧ ныв-зонма олӧм.
Батьсӧ батявны пиыс оз лысьт.
Быдмӧ зон: мамлӧн — синваа радлун,
Батьлӧн — зарниӧн гӧгыльтчысь лов.
Быд ног катласьӧ вуджӧрыс кадлӧн,
Вайлӧ лёкторсӧ — корны оз ков.
Шонді петігӧн батьыс да пиыс
Пыжӧн черила катісны тшӧтш.
Шуис Анна: «Видз ваысь да биысь.
Ӧтнас Колюк мед нинӧм оз вӧч!»

3.

Гожся вой шӧрыд радейтчысь ныв кодь:
Нюмӧ, югъялӧ, ньӧти оз узь.
Пыжа ю кузя тэрмасьӧ кывтӧ,
Кольӧ туй сылӧн быгъя да кузь.
Асъя кыакӧд ва дорсянь ньӧжйӧ
Анна керкалань матыстчӧ морт.
Сылӧн пельпомыс сьӧкыда ӧшйӧ,
Быттьӧ пӧткалӧн чегъяссьӧм борд.
Оз тай черилӧн сьӧктаыс личкы.
Оз тай висьӧмлӧн косявлы гыж.
Мортлысь сьӧлӧмсӧ дугдывтӧг пычкӧ
Дона ань водзын виччысьтӧм мыж.
Анна горзігтыр ва дорӧ лэччӧ,
Пыжлань видзӧдӧ, чышкалӧ син.
Сэсся ыджыда горӧн тшӧтш бӧрддзӧ...
Куйлӧ пыж шӧрас пиукыс кын.
Ивлӧн висьталӧм веськодьӧн вӧлі,
Кыдзи ӧтнасӧн вуграсис пи,
Кыдзи пыжӧ сэн виччысьтӧг сӧліс,
Уси... Ваысь эз кыпӧдлы ки.
Кыдзи корсьысис часысь на унджык...
Сӧмын нинӧм нин пилы эз ков.
Ачыс мӧвпаліс: «Лоас-ӧ бурджык,
Ме кӧ пи бӧрся вошта жӧ лов?»

4.

Куим во бара новлӧдліс Ивӧ
Чери ведраяс Анналы пыр.
Мый кӧть шу: «Абу дивӧ, кӧть — дивӧ!» —
Кага бӧрдӧмӧн керкаыс тыр.
Бара пиыс нин батьыскӧд ветлӧ,
Сӧмын бать-мамыс олӧны рӧзь.
Батьыс гӧтрасян мӧвпсӧ пыр вӧтлӧ,
Кӧть и муслуныс важсьыс на пӧсь.

5.

Анна школаӧ нуӧдіс писӧ.
«Босьтны грамота Колялы кад.
Сӧмын батьыс тай неуна висьӧ...
Бурдас, гижсям, и лоас сэк лад».
Тадзи кывтісны Анналӧн мӧвпъяс.
Югыд ру сорӧн вӧзйысис шуд,
Эз кӧ норлуныс виччысьтӧг кӧвъясь,
Тӧдтӧмтор эз кӧ сьӧлӧмсӧ кут.

6.

Воис гортас, а мамыс нин бӧрдӧ,
И суседъяслӧн синманыс шог.
Ёна повзьӧмысь разьсьытӧм кӧртӧд
Быттьӧ Анналысь зэлӧдіс кок.
Куйліс лабичын Ивӧ, эз лолав,
Эз нин нюм сорӧн вӧрзьӧдышт ус.
Оз нин ваксигтыр Аннасӧ корав...
Вевттис чужӧмсӧ кокньыдик бус.
Сьӧлӧм висьӧмысь помассис Ивӧ.
Весиг Аннаыс ставсӧ эз тӧд.
Морт эз гӧтрасьлы, медсясӧ, сійӧн,
Медым, кувсяс кӧ, некод оз бӧрд.
Кыдзкӧ позяс мӧй бӧрдӧмсӧ кутны,
Збыль кӧ сьӧлӧмад муслуныд эм,
Дона мортлы кӧ сэсся не сувтны,
Ковмас ӧткӧн кӧ коллявны нэм?!
Сӧмын Аннаӧс пиыс и видзис:
Лоис верстьӧ да дӧзьӧра морт,
Отсӧг, кокньӧдлун сы дорысь вичмис,
Бура сы помысь шонавліс горт.