ӦШИНЬ ДОРЫН

Туйяс кузя ветлӧны машинаяс.
Туйяс вылын менам сьӧлӧм дой.
Ӧшинь дорын юрсиӧс ме сынала,
Дӧзьӧрита гожся югыд вой.
Туйяс пиысь ӧти таті кытшовтӧ,
Шонтӧ ловнас менсьым ӧшинь дор.
Ог и тӧдлы, кыдзи ачым ышловзя,
Мыйӧн кыла ме машина гор.
Эз-ӧ татчӧ веськав сьӧлӧм дойдысьӧй?
Эз-ӧ сылӧн гажыс меысь быр?
Визув войт моз ӧдйӧ кадыс войтыштӧ.
Некод сӧмын ме ордӧ оз пыр.
Гашкӧ, сійӧ аддзис меысь мусаӧс,
Гӧрддзассис нин, гашкӧ, менам шог...
И машина сылӧн мӧдӧс чуксалас,
Некор сэсся ме ордӧ оз лок.
Сьӧлӧм пессьӧ, ковтӧм мӧвплы водзсасьӧ:
«Некыдзи оз лӧсяв татшӧмтор!»
Эг и тӧдлы, мам нин менам босьтасьӧ,
Пырӧ тай нин муса зон-шофёр.