МЕД ЗАВИДЬТӦНЫ

Посёлок садьмӧ, тшыналӧ, йӧз ветлысь зэв на шоч.
Вӧр кыскыны машинаӧн ме кая водза-водз.
Гӧрд кепыся, гӧрд чышъяна, лӧз паськӧма любов
лым зыртӧма, лым чышкӧма — туй корсьны мен оз ков.
Сюсь синмӧн синмӧ видзӧдлас да шуас мелі кыв —
став олӧм-вылӧм мичмӧдас бур сьӧлӧма том ныв.
Вой пемыдыс, лун югыдыс мен сэки ӧткодь бур.
Мед завидьтӧны мукӧдыс — мӧд татшӧм ныв оз сюр.
Гӧрд кепыся, гӧрд чышъяна, лӧз паськӧма любов
лым зыртӧма, лым чышкӧма — туй корсьны мен оз ков.