ЗОН КОРӦ НЫЛӦС

Зон воис татчӧ — войвыв муӧ —
Да муса нывсӧ дінас корӧ.
Быд пошта сылысь юӧр нуӧ
Печора дорсянь Днепр ю дорӧ.

«Ме бара гижа тэныд письмӧ
Да кора ас дорӧ тшӧтш овны.
Он тӧд тэ, кыдзи мырпом кисьмӧ
Да кутшӧм сэки кокньыд ловлы.

Быд асывводзын выль ног садьмӧ
Веж тундра, выль ног лов шы сетӧ.
Кӧть лунысь лунӧ шонді надзмӧ,
Бур серпас быдладорсянь петӧ.

Ва войт кодь сӧдз лӧз енэж таскыс,
Сук карлик кыдзьяс гӧрдов-вижӧсь.
То кайӧ ру кӧр сюръяс раскысь,
То гӧгӧр ӧшкамӧшка визьяс.

Тан море аслыс ногӧн гызьӧ,
Стрӧг синмӧн корӧ локны дінас,
Бур сьыланкывъяс мортлысь кывзӧ
Да ружтігтырйи жуглӧ йияс.

Зэв улӧдз ӧшӧдчывлӧ енэж —
Кӧть кутчысь кодзувъясас кинад.
Кор ассьыс паськӧм муыс вежӧ,
Выль лолӧн лолалӧ став сынӧд.

Сэзь войяс ӧзйӧны сё рӧмӧн.
Кык воськов вӧч — и пыран мойдӧ...
То ывла рӧдтӧ зарни вӧлӧн,
То лэбзьӧ эзысь корадоддьӧн.

Но медся бурыс, медся мичыс
Йӧз сьӧлӧм пиын ӧні олӧ.
Морт морткӧд ловнас весиг йитчӧ
И аддзӧ ставсӧ, мый тась колӧ.

Он мичсӧ весит вески вылын,
Он муртав ведраясӧн бурсӧ.
Но эскы меным, муса нылӧй,
Тан олӧм топыдджыка вурсьӧ.

Со талун бара ыджыд шудлун:
Му пытшкыс гора сьылӧ микӧд;
Ми ставӧн ӧта-мӧдӧс кутлам —
Зэв лӧсьыд сьӧлӧм вылын, нимкодь.

Фонтаныс нефтьлӧн енэж пыкӧ,
И милань шонді постӧг лэччӧ.
Став тундра эрдыс тырӧ зыкӧн.
Тадз тані овлывлӧ оз ӧтчыд.

Лок татчӧ, менам муса нылӧй.
Тэд шуд и мич, и гажлун сюрӧ.
Кӧть уна йӧз, но ӧтик кылӧн
Став мӧвпыс пырӧ миян юрӧ.

Ми шуам: дружба — йӧзкост дружба!
Быд мортлы тӧдса тайӧ кылыс.
Став бурсӧ сійӧ миян чужтас,
И сыкӧд шудлун лоас тырыс.

Быд мусянь локтӧмаӧсь зонъяс.
Быд зон тэд вокӧн вермас лоны.
Став нылыс, колӧ кӧ, бур чойяс.
Тан лоас гажа тэныд овны.

Лэб татчӧ, менам муса нылӧй,
Лэб мича юсьяс чужанінӧ.
Зон сьӧлӧм менам бура кылӧ,
Мый аддза тэнӧ аслам синмӧн».